આણંદ જિલ્લાના ખંભોળજ પોલીસ મથક હેઠળના વિસ્તારમાંથી સગીરાને ભગાડી જવાના ચકચારી બનાવમાં પોલીસે કાયદાનો આકરો કોરડો વીંઝી સપાટો બોલાવ્યો છે. ખંભોળજ પોલીસની ટીમને ગુપ્ત બાતમી મળી હતી કે સગીરાનું અપહરણ કરનાર મુખ્ય આરોપી મોરબી પંથકમાં છુપાયો છે. મળેલી ચોક્કસ બાતમીના આધારે પોલીસે વિલંબ કર્યા વિના તાબડતોબ દરોડો પાડી મોરબી ખાતેથી સગીરાને હેમખેમ મુક્ત કરાવી હતી. આ સાથે જ પોલીસે મુખ્ય આરોપી મેહુલકુમાર ગોવિંદભાઈ ઠાકોરને ઝડપી પાડી તેની સામે કાયદેસરની કડક કાર્યવાહી હાથ ધરી હતી.
આ ગંભીર ગુનાની ઊંડાણપૂર્વકની તપાસ દરમિયાન ચોંકાવનારો ખુલાસો થયો હતો કે આ કૃત્યમાં માત્ર મુખ્ય આરોપી જ નહીં, પરંતુ તેને ભગાડવામાં વાહન અને આશરો પૂરો પાડનારા સાગરીતો પણ એટલા જ જવાબદાર છે. પોલીસે કાયદાનો ગાળિયો મજબૂત કરીને ગુનામાં સાથ-સહકાર આપનારા પિયુષકુમાર કનુભાઈ ઠાકોર, આકાશકુમાર રજનીભાઈ વાઘેલા તેમજ આ કૃત્ય માટે ઉપયોગમાં લેવાયેલી ઈનોવા કારના માલિક કુણાલકુમાર કિરીટભાઈ પટેલની પણ ધરપકડ કરી લીધી છે. અપહરણના ગુનામાં ગાડીની વ્યવસ્થા કરવા અને મદદગારી કરવા બદલ આ તમામ મદદગારોને પણ જેલના સળિયા પાછળ ધકેલી દેવાયા છે.
આ સફળ કામગીરી બાદ ખંભોળજ પોલીસે ગુનેગારો તેમજ તેમને છાવરતા તત્વો માટે સ્પષ્ટ અને કડક ચેતવણી જારી કરી છે. પોલીસે જણાવ્યું છે કે ઘટના સમયે જો પીડિતા સગીર વયની હોય, તો ત્યારબાદ તેની ઉંમર અઢાર વર્ષ થઈ જાય કે તેના લગ્ન કરાવી દેવામાં આવે તોપણ કાયદાકીય તપાસ કે નોંધાયેલા ગુના પર તેની કોઈ અસર થતી નથી. સગીરાને ભગાડી જવામાં પ્રત્યક્ષ કે પરોક્ષ રીતે વાહન, નાણાં કે રહેવાની સગવડ આપવી એ પણ ગંભીર ગુનો બને છે અને આવા કોઈ પણ મદદગારો કાયદાના સકંજામાંથી બચી શકશે નહીં.
