વિશ્વની અગ્રણી ટેકનોલોજી કંપની એપલે તેના સૌથી મોંઘા અને પ્રીમિયમ સ્માર્ટફોન આઇફોન ૧૮ પ્રો અને આઇફોન ૧૮ પ્રો મેક્સના ઉત્પાદનમાં મોટો કાપ મૂકવાનો નિર્ણય કર્યો છે. વૈશ્વિક સ્તરે અપેક્ષા કરતાં ઓછી માંગ રહેતાં કંપનીએ પાર્ટ્સ બનાવતા સપ્લાયર્સને ઓક્ટોબર મહિનાના ઓર્ડરમાં ૧૫ થી ૨૦ ટકા સુધીનો ઘટાડો કરવા સૂચના આપી છે. સપ્ટેમ્બર મહિનામાં ધમાકેદાર લોન્ચિંગ બાદ પ્રારંભિક તબક્કામાં જે ભારે ઉત્સાહ જોવા મળ્યો હતો, તે હવે ધીમો પડી રહ્યો છે. મેમરી ચિપના વધતા ખર્ચ અને ઉપકરણોના આસમાને પહોંચેલા ભાવોને કારણે ગ્રાહકો હવે ખરીદી કરતાં પહેલાં બે વાર વિચારી રહ્યા છે.
ભારતીય બજારમાં આઇફોન ૧૮ પ્રોની શરૂઆતી કિંમત રૂપિયા ૧,૬૪,૯૦૦ અને આઇફોન ૧૮ પ્રો મેક્સની કિંમત રૂપિયા ૧,૭૯,૯૦૦ જેટલી ઊંચી રાખવામાં આવી છે, જે ગત પેઢીના મોડેલો કરતાં નોંધપાત્ર રીતે વધારે છે. સામાન્ય રીતે દર બે-ત્રણ વર્ષે પોતાનો ફોન અપગ્રેડ કરતા ગ્રાહકો માટે આ ભાવવધારો મોટો બોજ બની રહ્યો છે. વૈશ્વિક સ્તરે ૩૦થી વધુ મોટા બજારોમાં આ પ્રીમિયમ ફોનનો ડિલિવરી માટેનો પ્રતીક્ષા સમય ઝડપથી ઘટ્યો છે. જો પુરવઠો સ્થિર હોય અને વેઇટિંગ પિરિયડ ઘટે, તો તેનો સીધો અર્થ એ છે કે નવા મોડેલ માટે ગ્રાહકોમાં સ્પર્ધા કે આકર્ષણ ઘટ્યું છે.
હાલની સુસ્તીની અસર કંપનીના પ્રથમ ફોલ્ડેબલ સ્માર્ટફોન 'આઇફોન ડ્યુઓ' ના ભવિષ્ય પર પણ પડી શકે છે. ભારતમાં ૨૫૬ જીબી મોડેલ માટે લગભગ રૂપિયા ૨,૯૯,૯૦૦ જેટલી જંગી કિંમત હોવાથી તે મોંઘી ટેકનોલોજી ખરીદવા ઉત્સુક ગ્રાહકો માટે પણ એક મોટો અવરોધ સાબિત થઈ શકે છે. ફોલ્ડિંગ સ્ક્રીનનું જટિલ ઉત્પાદન અને કંપનીના કડક ગુણવત્તા ધોરણો વચ્ચે ઊંચા ભાવને કારણે આ ઉપકરણને પણ પડકારોનો સામનો કરવો પડી શકે છે. સ્માર્ટફોન બજારમાં વધતી મોંઘવારીને પગલે હવે ટેકનોલોજી ક્ષેત્રે ખરીદીના સમીકરણો ઝડપથી બદલાઈ રહ્યા છે.
