અંડર-૧૯ એશિયા કપનું સમયપત્રક જાહેર: ૮ નવેમ્બરે ભારત અને પાકિસ્તાન વચ્ચે ખેલાશે મહામુકાબલો

એશિયન ક્રિકેટ કાઉન્સિલ દ્વારા આગામી પુરુષ અંડર-૧૯ એશિયા કપ ૨૦૨૬ના સત્તાવાર સમયપત્રકની જાહેરાત કરવામાં આવી છે. ૫ નવેમ્બરથી ૧૪ નવેમ્બર દરમિયાન ઓમાન ખાતે નવ દિવસ સુધી આ રોમાંચક ટુર્નામેન્ટ રમાશે. આ પ્રતિષ્ઠિત સ્પર્ધામાં એશિયાની કુલ ૮ ટીમો ભાગ લઈ રહી છે અને તમામ ૧૫ મુકાબલા ઓમાન ક્રિકેટ એકેડેમીના બે મેદાનો પર યોજાશે. સમગ્ર ટુર્નામેન્ટ ૫૦ ઓવરના ફોર્મેટમાં રમાશે અને દરેક મેચ ભારતીય સમય મુજબ સવારે ૧૦:૩૦ વાગ્યે શરૂ થશે. આ વખતે પાકિસ્તાનની ટીમ ડિફેન્ડિંગ ચેમ્પિયન તરીકે મેદાનમાં ઉતરશે.

ટુર્નામેન્ટમાં ભાગ લઈ રહેલી આઠ ટીમોને ચાર-ચારના બે ગ્રુપમાં વહેંચવામાં આવી છે. ગ્રુપ ‘અ’માં ભારત, પાકિસ્તાન, સંયુક્ત આરબ અમીરાત (યુએઈ) અને નેપાળ સામેલ છે. જ્યારે ગ્રુપ ‘બ’માં શ્રીલંકા, બાંગ્લાદેશ, અફઘાનિસ્તાન અને મલેશિયાને સ્થાન મળ્યું છે. ક્રિકેટ રસિકો માટે સૌથી મોટું આકર્ષણ ૮ નવેમ્બરના રોજ રહેશે, જ્યારે પરંપરાગત હરીફ ભારત અને પાકિસ્તાન વચ્ચે હાઇ-વોલ્ટેજ મેચ ઓમાન ક્રિકેટ એકેડેમીના ગ્રાઉન્ડ ૧ પર રમાશે. ગત વર્ષે ફાઇનલમાં મળેલી હારનો હિસાબ સરભર કરવા અને ટ્રોફી પોતાના નામે કરવા માટે ભારતીય યુવા ટીમ આતુર રહેશે.

સ્પર્ધાનો પ્રારંભ ૫ નવેમ્બરે બે મેચ સાથે થશે, જેમાં શ્રીલંકા સામે મલેશિયા અને બાંગ્લાદેશ સામે અફઘાનિસ્તાનની ટક્કર થશે. ભારતીય ટીમ પોતાના અભિયાનની શરૂઆત ૬ નવેમ્બરે નેપાળ સામે કરશે, જ્યારે તે જ દિવસે પાકિસ્તાનનો મુકાબલો યુએઈ સામે થશે. લીગ તબક્કાની મેચો ૧૦ નવેમ્બર સુધી ચાલશે, જેમાં અંતિમ દિવસે ભારત સામે યુએઈ અને પાકિસ્તાન સામે નેપાળ રમશે. ફાઇનલ સિવાયના તમામ દિવસોમાં બે-બે મેચો રમાડવામાં આવશે.

લીગ તબક્કાની ૧૨ મેચો બાદ બંને ગ્રુપની ટોચની બે-બે ટીમ સેમિફાઇનલમાં પ્રવેશ મેળવશે. બંને સેમિફાઇનલ મુકાબલા ૧૨ નવેમ્બરે રમાશે. પ્રથમ સેમિફાઇનલમાં ગ્રુપ ‘અ’ની ટોચની ટીમ સામે ગ્રુપ ‘બ’ની બીજા ક્રમની ટીમ ટકરાશે, જ્યારે બીજી સેમિફાઇનલમાં ગ્રુપ ‘બ’ની વિજેતા અને ગ્રુપ ‘અ’ની ઉપવિજેતા ટીમ વચ્ચે જંગ જામશે. ત્યારબાદ બંને સેમિફાઇનલની વિજેતા ટીમો વચ્ચે ૧૪ નવેમ્બરે ઓમાન ક્રિકેટ એકેડેમીના મેદાન પર ખિતાબી ફાઇનલ મુકાબલો રમાશે.