અમદાવાદના વ્યસ્ત કાલુપુર રેલવે સ્ટેશન પર મુસાફરોની ભોળપ અને લાચારીનો ગેરલાભ ઉઠાવી ઠગાઈ આચરતી એક કુખ્યાત ટોળકીનો પોલીસે પર્દાફાશ કર્યો છે. ટ્રેનની રાહ જોઈ રહેલા અજાણ્યા મુસાફરોને પોતાની બનાવટી કહાનીઓમાં ફસાવી તેમની પાસેથી રોકડ તેમજ ડિજિટલ માધ્યમથી નાણાં પડાવી લેતા દિલ્હીના બે રીઢા ગુનેગારોને કાલુપુર પોલીસે બાતમી અને સીસીટીવી ફૂટેજના આધારે દબોચી લીધા છે. પકડાયેલા આરોપીઓ પાસેથી રોકડ રકમ અને મોબાઈલ ફોન પણ જપ્ત કરવામાં આવ્યા છે.
આ સમગ્ર ઘટનાની વિગત મુજબ, મહારાષ્ટ્રના વતની અને વ્યવસાયે ઇલેક્ટ્રિશિયન જયપ્રકાશ તિવારી અમદાવાદ ખાતે કામ પૂર્ણ કરી પરત જવા રેલવે સ્ટેશને પહોંચ્યા હતા. તે દરમિયાન એક અજાણ્યા શખ્સે તેમની પાસે આવી પોતાની ઓળખ આપી શેઠે પગાર આપ્યા વગર માર મારીને કાઢી મૂક્યો હોવાની ખોટી કહાની સંભળાવી હતી. શખ્સે પોતાની પાસે બે લાખ રૂપિયાનું બંડલ હોવાનું કહી ચા-પાણી માટે રૂપિયા ન હોવાનો ઢોંગ કર્યો હતો. મુસાફરને દયા આવતા તેઓ ચા પીવડાવવા લઈ ગયા હતા, જ્યાં અન્ય એક સાગરીત પણ આવી પહોંચ્યો હતો. ચા પીધા બાદ મુસાફરનું માથું ભારે થઈ જતાં બંને આરોપીઓએ નજર ચૂકવી તેમની સોનાની ચેઇન, મોબાઇલ અને ઓનલાઇન માધ્યમથી સિત્તેર હજારથી વધુ રૂપિયા ટ્રાન્સફર કરાવી લીધા હતા.
ભોગ બનનાર મુસાફરે તરત જ કાલુપુર પોલીસ મથકે ફરિયાદ નોંધાવતા પોલીસે સીસીટીવી કેમેરા અને આધુનિક ટેકનિકલ સર્વેલન્સની મદદથી તપાસ હાથ ધરી હતી. પોલીસે ગણતરીના સમયમાં દિલ્હીના તનવીર અંસારી અને સંજય શર્મા નામના બંને આરોપીઓને ઝડપી પાડ્યા હતા. પોલીસ તપાસમાં બહાર આવ્યું છે કે બંને આરોપીઓ અગાઉ દિલ્હીમાં પણ ચોરી અને ખિસ્સા કાપવાના ગુનાઓમાં સામેલ હતા. આ ઉપરાંત બંને શખ્સો ઓનલાઇન ગેમિંગ અને જુગારની લતમાં દેવાદાર બની ગયા હોવાથી આ નુકસાનની ભરપાઈ કરવા મુસાફરોને શિકાર બનાવતા હતા. હાલ પોલીસે આ ટોળકી વિરુદ્ધ ગુનો નોંધી વધુ તપાસ શરૂ કરી છે.
