ક્રિકેટના મેદાન પર ક્યારેક એવા નિર્ણયો લેવાતા હોય છે જે ચાહકોની સાથેસાથે દિગ્ગજ ખેલાડીઓને પણ ચોંકાવી દે છે. તાજેતરમાં જ આવો જ એક મામલો સામે આવ્યો છે, જ્યાં યુવા બેટ્સમેન વૈભવ સૂર્યવંશીને બેટિંગમાં ઉતારવાના ક્રમને લઈને ચર્ચાઓ શરૂ થઈ ગઈ છે. ભૂતપૂર્વ ભારતીય સ્પિનર મુરલી કાર્તિકે આ મામલે સવાલ ઉઠાવતા ખુલ્લેઆમ કહ્યું છે કે આટલા નાના ખેલાડી સાથે તેની કુદરતી રમત બાબતે ચેડા ન કરવા જોઈએ. કાર્તિકના મતે વૈભવની ખરી તાકાત તો ઇનિંગની શરૂઆત કરવામાં જ છે, તો પછી તેને નંબર 3 પર કેમ મોકલવામાં આવ્યો તે સમજાતું નથી.
મેચ પછીના પ્રસારણ દરમિયાન વાતચીત કરતા મુરલી કાર્તિકે જણાવ્યું કે વૈભવ સૂર્યવંશી ઓપનિંગમાં શાનદાર બેટિંગ કરી શકે છે, કારણ કે તેણે અત્યાર સુધીની કરિયરમાં મોટે ભાગે શરૂઆતની ઓવરોમાં જ રમીને પોતાની ઓળખ બનાવી છે. તેણે ક્યારેય વચ્ચેની ઓવરોમાં લાંબી બેટિંગ નથી કરી. કાર્તિકે ઉમેર્યું કે ટીમમાં અનુભવી ખેલાડીઓને એટલા માટે જ રાખવામાં આવે છે કે તેઓ પરિસ્થિતિ મુજબ અલગ અલગ ભૂમિકાઓ ભજવી શકે. જો ટીમ મેચ જીતી જાય તો ભલે બધું સારું લાગે, પરંતુ જો તમે વૈભવ જેવા યુવા ખેલાડીને ટીમમાં રાખી રહ્યા છો, તો તેને તેની યોગ્ય જગ્યા એટલે કે ઓપનિંગમાં જ મોકલવો જોઈએ.
વૈભવ સૂર્યવંશી માટે આ વાપસી ખૂબ જ મોટી તક સમાન હતી, પરંતુ તે આનો પૂરેપૂરો ફાયદો ઉઠાવવામાં ચૂકી ગયો. જો ટીમ મેનેજમેન્ટનો પ્લાન વૈભવને ઓપનિંગ ન કરાવવાનો જ હતો, તો પછી મિડલ ઓર્ડર માટે અન્ય વિકલ્પો પણ ઉપલબ્ધ હતા જ. કાર્તિકના જણાવ્યા મુજબ, શિવમ દુબે જેવા પ્લેયરને મિડલ ઓર્ડરમાં તક આપી શકાઈ હોત. ભલે ટીમ આ મુકાબલો જીતવામાં સફળ રહી હોય, પરંતુ વૈભવ સૂર્યવંશી પોતાના બેટથી કોઈ ખાસ પ્રભાવ પાડવામાં નિષ્ફળ રહ્યો, જેના કારણે આગામી મેચો માટે પ્લેઇંગ 11ની રણનીતિ પર ફરીથી વિચાર કરવો પડે તેમ છે.
