જામનગર શહેરના ગ્રીનસિટી વિસ્તારમાં આવેલી જાણીતી 'પાપાલુઈઝ' રેસ્ટોરન્ટમાં ગ્રાહકને પીઝામાંથી જીવાત મળી આવવાની ગંભીર ઘટના સામે આવ્યા બાદ તંત્ર હરકતમાં આવ્યું છે. ગ્રાહકની સત્તાવાર ફરિયાદના આધારે જામનગર મહાનગર પાલિકાની ફૂડ શાખાની ટીમે તાત્કાલિક સ્થળ તપાસ કરી હતી અને ગ્રાહક સુરક્ષા તેમજ ખાદ્ય સુરક્ષાના ધોરણોનો ભંગ થવા બદલ રેસ્ટોરન્ટ સંચાલકને રૂપિયા ૩,૦૦૦ ની પેનલ્ટી ફટકારી હતી. આ ઘટનાને પગલે ખાણીપીણીના શોખીનોમાં અને શહેરના રેસ્ટોરન્ટ સંચાલકોમાં પણ ભારે ચર્ચા જાગી છે તથા સ્વચ્છતા જાળવવા અંગે કડક સંદેશો ગયો છે.
આ ઉપરાંત શહેરમાં દૂધની ગુણવત્તા અને તેમાં થતી સંભવિત ભેળસેળને ડામવા માટે ફૂડ વિભાગ દ્વારા વિશેષ ઝુંબેશ ચલાવવામાં આવી રહી છે. છેલ્લા ત્રણ દિવસ દરમિયાન વહેલી સવારે દૂધના વિતરણ કેન્દ્રો અને વાહનોમાંથી કુલ ૫૮ જેટલા સેમ્પલ લેવામાં આવ્યા હતા, જેમાંથી ૫૧ નમૂના જામનગરની સ્થાનિક લેબોરેટરીમાં અને ૭ નમૂના વધુ સચોટ પરીક્ષણ માટે વડોદરાની અત્યાધુનિક લેબમાં મોકલી આપવામાં આવ્યા છે. આ તપાસ દરમિયાન જે દૂધનો જથ્થો સ્ટાન્ડર્ડ નોર્મલ ન જણાતા શંકાસ્પદ લાગ્યો, તેવા અંદાજે ૧૭૦ લીટર જેટલા દૂધના જથ્થાને સ્થળ પર જ નાશ કરીને ગ્રાહકોના આરોગ્ય સાથે ચેડાં અટકાવવાની સરાહનીય કામગીરી કરવામાં આવી છે.
માત્ર રેસ્ટોરન્ટ કે ડેરી જ નહીં પરંતુ ફૂડ શાખાની ટીમો દ્વારા હાઈ-વે પર આવેલી હોટલો, ધાબાઓ તેમજ ખાદ્ય પદાર્થોનું વેચાણ કરતા એકમો પર પણ સઘન ચેકિંગ હાથ ધરવામાં આવ્યું છે. ઉનાળાની સિઝનને ધ્યાનમાં રાખીને બજારમાં વેચાતા ક્રોઝન ડેઝર્ટ અને આઈસ્ક્રીમના નમૂનાઓ તથા તેની ગુણવત્તા બાબતે પણ ઝીણવટભરી તપાસ ચાલી રહી છે. તંત્રની આ આક્રમક અને નિરંતર કાર્યવાહીના કારણે ભેળસેળિયાઓ અને બેદરકારી દાખવતા ખાદ્ય વ્યવસાયિકોમાં ફફડાટ વ્યાપી ગયો છે, જે નાગરિકોના સ્વાસ્થ્ય રક્ષણ માટે અત્યંત આવશ્યક પગલું સાબિત થઈ રહ્યું છે.
