આંતરરાષ્ટ્રીય સ્તરે ક્રિકેટના મેદાન પર સતત અલગ પડતા પાકિસ્તાને ફરી એકવાર પોતાની હાસ્યાસ્પદ માનસિકતાનું પ્રદર્શન કર્યું છે. વર્તમાન સમયમાં રમાઈ રહેલી ટી-ટ્વેન્ટી વર્લ્ડ ચેમ્પિયનશિપ ઑફ લેજન્ડ્સ ટૂર્નામેન્ટમાં પાકિસ્તાન ક્રિકેટ બોર્ડે ભારત સામે બિનજરૂરી શરત મૂકીને છેવટે સ્પર્ધામાંથી ખસી જવાનો નિર્ણય લીધો છે. ટૂર્નામેન્ટ આયોજકો દ્વારા પાકિસ્તાનની પાયાવિહોણી અને ગેરવાજબી માગણીને સદંતર ફગાવી દેવામાં આવતા પાકિસ્તાન ભોંઠું પડ્યું હતું અને છેવટે પોતાની ટીમને આખી સ્પર્ધામાંથી બહાર કરી લીધી છે.
વાસ્તવમાં, વર્ષ ૨૦૨૫ દરમિયાન પહલગામમાં નિર્દોષ પર્યટકો પર થયેલા આતંકવાદી હુમલાના વિરોધમાં ભારતીય ટીમે દૃઢ વલણ અપનાવી પાકિસ્તાન સામે રમવાનો સ્પષ્ટ ઇનકાર કર્યો હતો. તે સમયે ભારતે પાકિસ્તાન સામેની લીગ મેચ તેમજ સેમિફાઇનલ જેવી મહત્ત્વપૂર્ણ મેચોનો બહિષ્કાર કરીને આતંકવાદને પ્રોત્સાહન આપતા પાડોશી દેશને વૈશ્વિક સ્તરે ખુલ્લો પાડ્યો હતો. ભારતના આ આકરા અને રાષ્ટ્રહિતના પગલાથી પાકિસ્તાન ક્રિકેટ બોર્ડ ભારે ક્ષોભજનક સ્થિતિમાં મુકાઈ ગયું હતું.
આ અપમાન પચાવી ન શકનાર પાકિસ્તાની બોર્ડે આ વખતે ટૂર્નામેન્ટની ત્રીજી સિઝનની શરૂઆતમાં જ ડ્રામા શરૂ કર્યો હતો. પાકિસ્તાને શાહિદ આફ્રિદી, સોહેલ તનવીર, મોહમ્મદ હાફીઝ, આસિફ અલી, વહાબ રિયાઝ, કામરાન અકમલ અને મોહમ્મદ આમિર જેવા ખેલાડીઓને મંજૂરી આપ્યા બાદ આયોજકો સમક્ષ એવી શરત મૂકી હતી કે, ભારતીય ખેલાડીઓ ગત વર્ષના બહિષ્કાર બદલ માફી માગે તો જ પાકિસ્તાનની ટીમ રમશે. પાકિસ્તાનની આવી વિચિત્ર માગણી સામે ભારતે સહેજ પણ ઝૂકવાની ના પાડી દીધી હતી.
ટૂર્નામેન્ટ મેનેજમેન્ટે પાકિસ્તાન ક્રિકેટ બોર્ડની આ માગણીને સીધી જ ફગાવી દેતાં પાકિસ્તાનનું નાટક ઊંધું પડ્યું હતું. બાંગ્લાદેશ સામેની પ્રથમ મેચ રદ થયા બાદ પાકિસ્તાને ભારતને ખોટી રીતે દોષિત ઠેરવીને સમગ્ર ટૂર્નામેન્ટ છોડી દીધી હતી. ખેલદિલી નેવે મૂકીને ખોટા બહાના કાઢવાની આ આદતને લીધે પાકિસ્તાન ફરી એકવાર સમગ્ર રમત જગતમાં ભારે હાંસીપાત્ર બન્યું છે.
