દિલ્હીની રાઉસ એવેન્યુ કોર્ટમાં એડિશનલ ચીફ જ્યુડિશિયલ મેજિસ્ટ્રેટ (ACJM) વિનોદ જોષીએ એડવોકેટ વિકાસ ત્રિપાઠી દ્વારા દાખલ કરવામાં આવેલી ફરિયાદના સંદર્ભમાં આઈ.પી. એસ્ટેટ પોલીસ સ્ટેશનના એસએચઓ (SHO) પાસે આ રિપોર્ટ માંગ્યો છે. આ કેસની આગામી સુનાવણી હવે આગામી 28 નવેમ્બરના રોજ હાથ ધરવામાં આવશે. સુનાવણી દરમિયાન ફરિયાદીએ ૧૯૮૦, ૧૯૮૧ અને ૧૯૮૩ની મતદાર યાદીઓની પ્રમાણિત નકલો રજૂ કરી હતી, જો કે કોર્ટે તેમને આ મતદાર યાદીઓની અસલ પ્રમાણિત નકલો સત્તાવાર રીતે રેકોર્ડ પર મૂકવા માટે નિર્દેશ આપ્યો છે. આ સમગ્ર મામલે વરિષ્ઠ વકીલ અજય બરમન ફરિયાદી તરફથી હાજર રહ્યા હતા.
ફરિયાદમાં એવો ગંભીર આરોપ મૂકવામાં આવ્યો છે કે સોનિયા ગાંધીએ એપ્રિલ ૧૯૮૩માં અધિકૃત રીતે ભારતીય નાગરિકતા મેળવી હતી, પરંતુ તે પહેલાં જ એટલે કે ૧૯૮૦માં તેમની નાગરિકતા ન હોવા છતાં મતદાર યાદીમાં તેમનું નામ સામેલ કરવામાં આવ્યું હતું. અગાઉ, સેશન્સ કોર્ટે મેજિસ્ટ્રેટ કોર્ટના તે આદેશને રદ કર્યો હતો જેમાં સોનિયા ગાંધી સામે એફઆઈઆર નોંધવાનો ઇનકાર કરવામાં આવ્યો હતો. સેશન્સ કોર્ટે અવલોકન કર્યું હતું કે અગાઉની કોર્ટે માત્ર ફોટોકોપીના આધારે ફરિયાદ ફગાવી દીધી હતી અને કેન્દ્ર સરકાર તથા ચૂંટણી પંચની સત્તાઓ અંગે કરેલા તારણો અયોગ્ય હતા. આથી, સેશન્સ કોર્ટે સમગ્ર મામલો ફરીથી વિચારણા માટે એસીજેએમ કોર્ટમાં પરત મોકલ્યો હતો.
સેશન્સ કોર્ટના નિર્દેશો અનુસાર હવે નવેસરથી કાર્યવાહી હાથ ધરવામાં આવી છે, જેમાં ૧૯૮૦માં નામ ઉમેરાયા બાદ ૧૯૮૨માં કથિત રીતે હટાવવા અને ફરી ૧૯૮૩માં ઉમેરવા જેવા મુદ્દાઓ સામેલ છે. મતદાર યાદીઓ માત્ર ભારતીય નાગરિકો માટે જ હોય છે અને આ મામલે રજૂ કરાયેલા દસ્તાવેજોમાં નવી દિલ્હીના સફદરજંગ રોડ પરના સરનામાનો પણ ઉલ્લેખ કરવામાં આવ્યો છે. જો કે, કોર્ટે સ્પષ્ટતા કરી છે કે તે પોતે જ નિર્ણય લેવાને બદલે પોલીસ અધિકારી પાસેથી સ્થિતિ અહેવાલ મેળવીને કાયદેસરની અને તર્કસંગત કાર્યવાહી કરશે. હાલ આ કેસમાં સોનિયા ગાંધી સામેના આરોપો માત્ર ફરિયાદના સ્વરૂપમાં છે અને તેના પર આગળની ન્યાયિક પ્રક્રિયા હજુ બાકી છે.
