આ મામલો ફિલાડેલ્ફિયા સ્કૂલ ડિસ્ટ્રિક્ટના શિક્ષક નીલ ફોલમેન સાથે જોડાયેલો છે, જેમણે કોવિડ-૧૯ મહામારી દરમિયાન સાપ્તાહિક કોવિડ ટેસ્ટ કરાવવાનો ઇનકાર કર્યો હતો. વર્ષ ૨૦૨૧માં શાળાઓ ફરી શરૂ થતી વખતે શાળા તંત્રએ ફરજિયાત સાપ્તાહિક ટેસ્ટનો નિયમ બનાવ્યો હતો, જેની સામે ફોલમેને વિવિધ વાંધાઓ રજૂ કરીને ટેસ્ટ કરાવવાની ના પાડી હતી. આ ઇનકારના પરિણામે તંત્ર દ્વારા તેમની સામે શિસ્તભંગના પગલાં લેવામાં આવ્યા અને આખરે ઓગસ્ટ ૨૦૨૧માં સ્કૂલ બોર્ડે તેમને નોકરીમાંથી બરતરફ કરવાનો ઠરાવ પસાર કર્યો હતો. આ સમગ્ર પ્રક્રિયા બાદ શિક્ષકે કાયદાકીય લડાઈ લડવાનો નિર્ણય કર્યો હતો.
બદલાયેલી કાનૂની લડાઈનો મુખ્ય મુદ્દો શિક્ષકને નોકરીમાંથી કાઢતી વખતે અપનાવવામાં આવેલી પ્રક્રિયાગત વિસંગતતા હતી. પેન્સિલવેનિયા સ્ટેટના કાયદા મુજબ, કાયમી (ટેન્યુર્ડ) શિક્ષકને બરતરફ કરવાની સુનાવણી વખતે ચૂંટાયેલા સ્કૂલ બોર્ડના સભ્યોનું હાજર રહેવું અનિવાર્ય છે. પરંતુ આશ્ચર્યજનક રીતે ફેબ્રુઆરી ૨૦૨૨માં યોજાયેલી આ સુનાવણીમાં એક પણ ચૂંટાયેલા બોર્ડ મેમ્બરે હાજરી આપી નહોતી અને તેના બદલે માત્ર એક નિયુક્ત હિયરિંગ ઓફિસર દ્વારા સમગ્ર કાર્યવાહી સંભાળવામાં આવી હતી. બાદમાં બોર્ડે માત્ર રેકોર્ડની સમીક્ષા કરીને શિક્ષકને બરતરફ કરવા પર મહોર મારી દીધી હતી, જેને શિક્ષકના વકીલે કાયદા વિરુદ્ધ ગણાવ્યો હતો.
આ કેસની સુનાવણી કરતા પેન્સિલવેનિયા સુપ્રીમ કોર્ટે નીચલી અદાલતોના ચુકાદાને માન્ય રાખતા જણાવ્યું હતું કે, બોર્ડના સભ્યોની ગેરહાજરીમાં થયેલી સુનાવણી કાયદેસરની સુનાવણી ગણી શકાય નહીં. કોર્ટે સ્કૂલ ડિસ્ટ્રિક્ટને આદેશ આપ્યો છે કે જ્યાં સુધી યોગ્ય કાનૂની પ્રક્રિયા અનુસરીને ફરીથી બરતરફી ન કરવામાં આવે ત્યાં સુધી શિક્ષકને પાછલી તમામ બાકી બેતન સાથે નોકરીમાં પુનઃસ્થાપિત કરવામાં આવે. આ ચુકાદો કોવિડ ટેસ્ટના વિરોધ કરતા વધુ કાયમી શાળા શિક્ષકોના અધિકારો અને બોર્ડની વહીવટી જવાબદારીઓ માટે એક સીમાચિહ્નરૂપ સાબિત થયો છે.
