ન્યુઝીલેન્ડ સામેની પ્રથમ ટેસ્ટ મેચ માટે ભારતીય ટીમની પ્લેઈંગ ઈલેવન જાહેર થયા બાદ ક્રિકેટ જગતમાં મોટો વિવાદ સર્જાયો છે. ભારતના દિગ્ગજ ખેલાડી અને પૂર્વ કેપ્ટન સુનીલ ગાવસ્કર તેમજ પૂર્વ મુખ્ય કોચ રવિ શાસ્ત્રીએ મોહમ્મદ સિરાજને ટીમમાંથી બહાર રાખવાના નિર્ણયની આકરી ટીકા કરી છે. મેનેજમેન્ટે જસપ્રિત બુમરાહ, પ્રસિદ્ધ કૃષ્ણા, આકાશ દીપ અને અંશુલ કમ્બોજને ચાર ઝડપી બોલર તરીકે ટીમમાં સામેલ કર્યા છે, પરંતુ સિરાજ જેવા મેચ વિનર બોલરની બાદબાકીથી અનેક ખેલાડીઓ અને વિશેષજ્ઞો ચોંકી ઉઠ્યા છે. ગાવસ્કરે આ નિર્ણયને અગમ્ય અને આશ્ચર્યજનક ગણાવતા કહ્યું કે સિરાજે એવું કંઈ ખોટું નથી કર્યું કે જેના કારણે તેને પડતો મૂકવામાં આવે.
આ મુદ્દે વાત કરતા સુનીલ ગાવસ્કરે જણાવ્યું હતું કે જ્યારે સિરાજને વનડે ટીમમાં સામેલ કરવામાં આવ્યો હતો ત્યારે જ સંકેતો મળી ગયા હતા કે તેને ટેસ્ટ માટે તૈયાર કરવામાં આવી રહ્યો છે. છેલ્લી મેચમાં તેનું પ્રદર્શન પણ સારું રહ્યું હતું, છતાં તેને પ્લેઈંગ ઈલેવનમાં ન જોવો એ ખૂબ જ નિરાશાજનક છે. સિરાજે ક્યારેય ભારતને નિરાશ નથી કર્યું અને તેની બોલિંગમાં કોઈ ખામી ન હોવા છતાં તેને આરામ કે ડ્રોપ કરવાનો નિર્ણય સમજી શકાય તેમ નથી. બીજી તરફ, રવિ શાસ્ત્રીએ પણ સિરાજના અનુભવ, આક્રમકતા અને પિચ પર સીમ મૂવમેન્ટ મેળવવાની ક્ષમતાની વકાલત કરી છે. શાસ્ત્રીએ સવાલ ઉઠાવ્યો કે જ્યારે ઝડપ, કૌશલ્ય અને પરિસ્થિતિ મુજબ મેચ બનાવવાની ક્ષમતાની જરૂર હોય, ત્યારે મોહમ્મદ સિરાજ ક્યાં છે?
મેચના પ્રથમ દિવસની સ્થિતિ પર નજર કરીએ તો, ભારતીય બોલરોએ શરતમાં શાનદાર પ્રદર્શન કર્યું હતું. જસપ્રિત બુમરાહે ૩ વિકેટ ઝડપીને ન્યુઝીલેન્ડની ટીમને ૭૦ રનમાં ૫ વિકેટ ગુમાવી દેવાની દયનીય સ્થિતિમાં મૂકી દીધી હતી. જોકે, ત્યારબાદ કિવિ બેટ્સમેનોએ શાનદાર પુનરાગમન કર્યું હતું. હેનરી નિકોલ્સે અણનમ ૧૧૩ રન અને ગ્લેન ફિલિપ્સે અણનમ ૯૪ રનની યાદગાર ઇનિંગ રમી હતી. આ બંને વચ્ચે થયેલી અણનમ ૧૭૩ રનની ભાગીદારીના જોરે ન્યુઝીલેન્ડે પ્રથમ દિવસના અંતે ૮૨ ઓવરમાં ૫ વિકેટે ૨૪૩ રનનો સન્માનજનક સ્કોર બનાવી લીધો છે. ભારતીય ટીમ હવે આ મેચમાં કઈ રણનીતિ સાથે આગળ વધે છે તે જોવું રસપ્રદ રહેશે.
