ગુજરાત રાજ્યના રાજકારણમાં એક સમયે સર્વોચ્ચ હોદ્દાઓ ભોગવી ચૂકેલા અને પ્રદેશ ભાજપ અધ્યક્ષ તેમજ કૃષિ મંત્રી જેવા જવાબદાર પદો પર રહેલા આર.સી. ફળદુનું એક નવું જ અને પ્રેરણાદાયી સ્વરૂપ સામે આવ્યું છે. સામાન્ય રીતે ઉચ્ચ રાજકીય પદાધિકારીઓ સત્તાથી દૂર થયા બાદ વિલાસી કે આરામદાયક જીવન પસંદ કરતા હોય છે, પરંતુ આ તમામ બાબતોથી વિપરીત શ્રી ફળદુએ પોતાની માટી સાથેની વફાદારી અકબંધ રાખી છે. કાલાવડ પંથકમા આવેલા તેમના ખેતરમાં તેઓ જાતે જ સખત મહેનત કરતા નજરે પડ્યા છે, જેણે સૌનું ધ્યાન ખેંચ્યું છે.
'બાપનો ધંધો ખેતી દીકરો ના કરે તો કોણ કરે?' આ કહેવતને સાર્થક કરતા પૂર્વ મંત્રીએ પોતાના ખેતરમાં ઊભેલા પાકને બચાવવા અને પોષવા માટે જાતે જ ધોરિયામાં પાણી વાળવાની કઠિન શ્રમજીવી કામગીરી કરી હતી. ધરતીપુત્રનું જીવન જીવતા આ નેતાનો આ અંદાજ માત્ર દેખાડો નથી પરંતુ તેમની ખેતી પ્રત્યેની સાચી નિષ્ઠા દર્શાવે છે. જગતના તાતનું પેટ ઠારવા માટે અન્ન ઉપજાવતા ખેડૂત તરીકેનું તેમનું આ કર્મ આજના યુવાનો અને મહત્વાકાંક્ષી રાજકારણીઓ માટે એક જીવંત ઉદાહરણ પૂરું પાડે છે.
સોશિયલ મીડિયા પર વાયરલ થયેલા આ દ્રશ્યોએ માત્ર કાલાવડ કે સૌરાષ્ટ્ર જ નહીં પરંતુ સમગ્ર ગુજરાતના નાગરિકો અને ખેડૂત વર્ગમાં ભારે હર્ષ અને પ્રશંસા મેળવી છે. પદ અને પ્રતિષ્ઠા હોવા છતાં જમીન સાથે જોડાયેલા રહેવાની તેમની આ સાદાઈએ સોશિયલ મીડિયા યૂઝર્સના દિલ જીતી લીધા છે. આ વિડિયો દ્વારા તેમણે માત્ર ખેડૂત ભાઈઓને ખેતી કરવા માટેની હિંમત અને પ્રેરણા જ નથી આપી, પરંતુ સાચો અન્નદાતા ક્યારેય પોતાની મૂળ ઓળખ નથી છોડતો તે સાબિત કરી બતાવ્યું છે.
