યુકેના ડર્બીશાયરમાં રહેતા ૪૫ વર્ષીય એન્જિનિયર ડેવ બિલિંગ્સે ફેસબુકના માધ્યમથી માત્ર ૪,૦۰۰ પાઉન્ડમાં બોઈંગ ૭૩૭ વિમાનનો બોડી ફ્યુઝલેજ ખરીદ્યો છે. પ્રખ્યાત યુદ્ધ ફિલ્મ 'ધ ગ્રેટ એસ્કેપ'થી પ્રેરિત થઈને તેમણે આ વિમાનને પોતાના ઘરના બગીચામાં ૧૪ ફૂટ ઊંડા ખાડામાં ઉતારીને એક અનોખા ભૂગર્ભ બંકર પ્રોજેક્ટની શરૂઆત કરી છે. તેમના ૮ વર્ષના પુત્ર ઓલિવરની વિમાનો પ્રત્યેની રુચિને કારણે તેમને આ અનોખો વિચાર આવ્યો હતો, જોકે શરૂઆતમાં તેમની પત્ની બેથ આ યોજનાને લઈને ઉત્સાહી નહોતી અને તેને માત્ર કચરો ગણાવતી હતી, પરંતુ હવે સમય જતાં તેનો દ્રષ્ટિકોણ પણ બદલાયો છે.
આ મહત્ત્વાકાંક્ષી પ્રોજેક્ટ પાછળ અત્યાર સુધીમાં ૫૦,૦૦૦ પાઉન્ડથી વધુનો ખર્ચ થઈ ચૂક્યો છે અને હજુ પણ કોન્ક્રિટ, ઇન્સ્યુલેશન તથા મેશ માટે વધુ ૧૩,૦০০ પાઉન્ડનો ખર્ચ અંદાજવામાં આવ્યો છે. વિમાનની આસપાસ સુરંગોનું નેટવર્ક, ગુપ્ત રૂમો અને છુપા રસ્તાઓ બનાવવામાં આવી રહ્યા છે, જેમાં પ્રવેશવા માટે લાલ રંગના પરંપરાગત ટેલિફોન બૂથની અંદર એક ગુપ્ત લિફ્ટ શાફ્ટ પણ તૈયાર કરવામાં આવશે. વિમાનની અંદર વીજળી, સોલાર પેનલ, પાણીની બોરવેલ અને સેપ્ટિક ટેન્ક સાથે જોડાયેલું વિમાનનું અસલી શૌચાલય પણ કાર્યરત કરવામાં આવી રહ્યું છે, જેથી કટોકટીના સમયમાં પરિવાર મહિનાઓ સુધી બહારની દુનિયાથી અલગ રહી શકે.
ડેવ બિલિંગ્સના જણાવ્યા અનુસાર, આ ભૂગર્ભ બંકર મુખ્યત્વે મનોરંજન, પાર્ટીઓ કરવા અને પરિવાર સાથે રિલેક્સ થવા માટે બનાવવામાં આવી રહ્યું છે, જેમાં બાર માટે બેરલ અને ૩ થી ૬ મહિના ચાલે તેટલો ખોરાક તથા પીણાંનો જથ્થો સંગ્રહિત કરવામાં આવશે. જોકે, ગંભીર સંઘર્ષ કે કટોકટીની સ્થિતિ સર્જાય તો તે એક મજબૂત ફોલઆઉટ શેલ્ટર તરીકે પણ કામ આપી શકે છે. પોતાના આ અદ્ભુત પ્રોજેક્ટના વિડિયો તેઓ 'ટોર્નાડો ડેવ' નામની યુટ્યુબ ચેનલ પર શેર કરે છે અને પત્ની સાથેની લગ્નની ૧૦મી વર્ષગાંઠ અગાઉ ફેબ્રુઆરી સુધીમાં આ કામ પૂર્ણ કરવાનો તેમનો લક્ષ્યાંક છે.
