JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
ગુજરાત

સંખેડાના હરિપુરા ગામેથી ૧૦ ફૂટ લાંબા અજગરનું સફળ રેસ્ક્યૂ, પશુપાલકની સતર્કતાથી ટળ્યો મોટો ભય

સંખેડાના હરિપુરા ગામેથી ૧૦ ફૂટ લાંબા અજગરનું સફળ રેસ્ક્યૂ, પશુપાલકની સતર્કતાથી ટળ્યો મોટો ભય
સંખેડા તાલુકાના હરિપુરા ગામની સીમમાંથી ૧૦ ફૂટ લાંબો વિશાળ અજગર મળી આવ્યો હતો. પશુપાલકની સમયસૂચકતાને કારણે બહાદરપુર એનિમલ રેસ્ક્યુ ટીમે તાત્કાલિક કાર્યવાહી કરી અજગરને સુરક્ષિત રીતે પકડી જંગલમાં મુક્ત કર્યો હતો.

સંખેડા તાલુકો છેલ્લા કેટલાક સમયથી વન્યજીવો, ખાસ કરીને અજગરો માટે સુરક્ષિત આશ્રયસ્થાન બનતો જઈ રહ્યો છે. તાજેતરમાં જ ખેરવા અને બહાદરપુર ગામેથી અજગર મળી આવ્યાની ઘટનાઓ હજુ તાજી જ હતી, ત્યારે હરિપુરા ગામની સીમમાં વધુ એક વખત અજગર દેખાવાની ઘટના સામે આવી છે. અહીં પશુઓની સતત અવરજવર રહેતી હોય તેવા મુખ્ય માર્ગ પર જ આશરે ૧૦ ફૂટ લંબાઈ ધરાવતો એક વિશાળ અજગર ગોળાકાર મુદ્રામાં બેસીને પોતાના શિકારની રાહ જોઈ રહ્યો હતો. આ ભયજનક દશ્ય જોઈને સ્થાનિક પશુપાલક શાંતિભાઈ મોતીભાઈ વસાવા તરત જ સતર્ક થઈ ગયા હતા અને કોઈપણ પ્રકારનો વિલંબ કર્યા વિના તેમણે વન વિભાગ અને રેસ્ક્યુ ટીમને આ બાબતની જાણ કરી હતી.

પશુપાલકનો કોલ મળતાની સાથે જ બહાદરપુર એનિમલ રેસ્ક્યુ ટીમમાંથી સચિન પંડિત અને હેમંતભાઈ તાત્કાલિક ઘટનાસ્થળે દોડી આવ્યા હતા. રેસ્ક્યુ ટીમના સભ્યોએ અત્યંત કુશળતા અને સાવચેતીપૂર્વક ઓપરેશન પાર પાડીને આ વિશાળ અજગરને સફળતાપૂર્વક પકડી લીધો હતો. આ સમગ્ર રેસ્ક્યૂ ઓપરેશન રેન્જ ફોરેસ્ટ ઓફિસર (RFO) રાકેશ વણકરના માર્ગદર્શન હેઠળ પાર પાડવામાં આવ્યું હતું. વન વિભાગ અને રેસ્ક્યુ ટીમની સમયસરની આ કામગીરીના કારણે પશુઓ તેમજ ગ્રામજનો પર તોળાઈ રહેલો મોટો ખતરો ટળી ગયો હતો, જેનાથી સૌએ રાહતનો શ્વાસ લીધો હતો.

અજગરને સુરક્ષિત રીતે પકડી લીધા બાદ રેસ્ક્યુ ટીમ દ્વારા તેને યોગ્ય અને સલામત કુદરતી વાતાવરણમાં એટલે કે નિર્જન જંગલ વિસ્તારમાં મુક્ત કરવામાં આવ્યો હતો. આ પ્રસંગે રેસ્ક્યુ ટીમે ઉપસ્થિત ગ્રામજનોને માર્ગદર્શન આપતા જણાવ્યું હતું કે, પર્યાવરણ અને કુદરતી આહાર શૃંખલાના સંતુલનને જાળવી રાખવામાં અજગર જેવા વન્યજીવોની ભૂમિકા અત્યંત મહત્વપૂર્ણ હોય છે. આથી, આવા મૂલ્યવાન જીવો દેખાય ત્યારે તેમને નુકસાન પહોંચાડવાને બદલે વન વિભાગ કે રેસ્ક્યુ ટીમને જાણ કરીને તેમના રક્ષણમાં સહયોગ આપવા માટે ગ્રામજનોને વિશેષ અપીલ કરવામાં આવી હતી.

LATEST ARTICLES