દેશના મહાન સ્વાતંત્ર્ય સેનાની અને જનજાતિય નાયક ભગવાન બિરસા મુંડાની ૧૫૧મી જન્મજયંતી તેમજ 'જન જાતિય ગૌરવ દિવસ'ની સાપ્તાહિક ઉજવણી અંતર્ગત છોટાઉદેપુરના ખુટાલિયા ખાતે આવેલા આર્ચરી ગ્રાઉન્ડ પર એક રંગારંગ અને ઉત્સાહવર્ધક ગ્રામ્ય રમતોત્સવનું આયોજન કરવામાં આવ્યું હતું. સ્થાનિક ધારાસભ્ય રાજેન્દ્રસિંહ રાઠવાના અધ્યક્ષસ્થાને યોજાયેલા આ વિશેષ કાર્યક્રમનો મુખ્ય ઉદ્દેશ યુવા પેઢીમાં વિસરાતી જતી પરંપરાગત દેશી રમતોને પુનર્જીવિત કરવાનો અને આદિવાસી સંસ્કૃતિનું જતન કરવાનો હતો. આ ભવ્ય રમતોત્સવમાં તાલુકાભરની વિવિધ શાળાઓમાં અભ્યાસ કરતા સેંકડો વિદ્યાર્થીઓ અને યુવા ખેલાડીઓએ ભારે ઉત્સાહ સાથે હાજરી આપી હતી.
આ રમતોત્સવ દરમિયાન વિદ્યાર્થીઓએ લીંબુ-ચમચી, ખો-ખો, દોરડા ખેંચ, તીરંદાજી અને કોથળા કૂદ જેવી અનેક પરંપરાગત દેશી રમતો રમીને પોતાની પ્રતિભા અને ખેલદીલીના દર્શન કરાવ્યા હતા. આ પ્રસંગે ઉપસ્થિત વક્તવ્યમાં ધારાસભ્ય રાજેન્દ્રસિંહ રાઠવાએ જણાવ્યું હતું કે વડાપ્રધાનની પ્રેરણાથી યોજાતા આવા કાર્યક્રમોથી બાળકોમાં ટીમ સ્પિરિટ અને સહકારની ભાવના વિકસે છે. આદિવાસી સમાજની સમૃદ્ધ પરંપરા અને સંસ્કૃતિને ઉજાગર કરવાની સાથે યુવાનો પોતાના શારીરિક સ્વાસ્થ્ય પ્રત્યે સભાન બને તે માટે આ પ્રકારના આયોજનો અત્યંત આવશ્યક અને પ્રશંસનીય છે.
કાર્યક્રમના અંતે વિવિધ રમતોમાં શ્રેષ્ઠ દેખાવ કરનાર અને વિજેતા બનેલા રમતવીરોને મહાનુભાવોના હસ્તે મેડલ અને ઇનામો આપીને પ્રોત્સાહિત કરવામાં આવ્યા હતા. આ મહોત્સવમાં તાલુકા પંચાયતના પ્રમુખ રમેશ રાઠવા, મામલતદાર, પૂર્વ નગરપાલિકા પ્રમુખ સંગ્રામસિંહ રાઠવા, નગરપાલિકા પ્રમુખ ડૉ. રજનીબેન રાઠવા, ચીફ ઓફિસર ભાવિન બરજોડ સહિત અનેક પદાધિકારીઓ, અધિકારીઓ, સ્થાનીક અગ્રણીઓ અને વિશાળ સંખ્યામાં ગ્રામજનો ઉપસ્થિત રહ્યા હતા. સમગ્ર વાતાવરણ ખેલકૂદના જોશ અને ઉત્સાહથી ગુંજી ઉઠ્યું હતું, જેણે સૌના માટે એક યાદગાર અનુભવ પૂરો પાડ્યો હતો.
