કરજણના નવાબજાર વિસ્તારમાં આવેલી ગેસ એજન્સી દ્વારા નગર સહિત આસપાસના આશરે 99 જેટલા ગ્રામ્ય વિસ્તારોમાં ગેસ સિલિન્ડરનું વિતરણ કરવામાં આવે છે. વર્તમાન નિયમો અનુસાર ગેસ બોટલ બુક કરવા માટે કેવાયસી અપડેટ કરાવવું અનિવાર્ય છે, જેના કારણે દૂર-દૂરના ગામડાઓમાંથી ગ્રાહકો પોતાના રોજિંદા ધંધા-રોજગાર અને કામકાજ છોડીને ભાડા ખર્ચીને એજન્સી પર આવે છે. પરંતુ, મોટાભાગે અહીં ગેસ ઓફિસના દરવાજા બંધ જોવા મળે છે, જેના કારણે ગ્રાહકોને કલાકો સુધી રાહ જોયા બાદ નિરાશ થઈને પરત ફરવાનો વારો આવે છે અને નાણાકીય તેમજ માનસિક નુકસાન સહન કરવું પડે છે.
તાજેતરમાં પણ આવા જ એક બનાવમાં પંદરથી વીસ જેટલા ગ્રાહકો કેવાયસી અદ્યતન કરાવવા માટે એજન્સી પર પહોંચ્યા હતા, પરંતુ દરવાજા બંધ હોવાથી ભારે મુશ્કેલી સર્જાઈ હતી. લાંબી પ્રતિક્ષા બાદ ગ્રાહકો પાછળના દરવાજે જતા એજન્સીના સંચાલકો કે સ્ટાફ દ્વારા તેમની સાથે અત્યંત તોછડું અને જવાબદારી વગરનું વર્તન કરવામાં આવ્યું હોવાના ગંભીર આક્ષેપો થયા છે. પરિસ્થિતિ વણસતા આખરે કંટાળેલા ગ્રાહકોએ કાયદો અને વ્યવસ્થાના ભાગરૂપે કટોકટી નંબર 100 પર કોલ કરવો પડ્યો હતો, જેના પગલે અડધા કલાક બાદ પોલીસની 112 ટીમ સ્થળ પર આવી પહોંચી હતી અને મામલો થાળે પાડવાનો પ્રયાસ કર્યો હતો.
ગેસ એજન્સીની બહાર સત્તાવાર રીતે કામનો સમય સવારના 8 થી રાતના 8 વાગ્યા સુધીનો દર્શાવવામાં આવ્યો હોવા છતાં વાસ્તવિક પરિસ્થિતિ તદ્દન વિપરીત છે અને ઓફિસ બંધ રહેતી હોવાથી ગ્રાહકો રોષે ભરાયા છે. આ સમગ્ર ગંભીર બાબતે કરજણ પુરવઠા મામલતદારને ટેલિફોનિક રજૂઆત કરવામાં આવતા તેમણે યોગ્ય તપાસ કરી કાર્યવાહી કરવાની ખાતરી આપી છે. વિશાળ વિસ્તારની એકમાત્ર એજન્સીના મનસ્વી અને બેજવાબદાર વહીવટ સામે સ્થાનિક નાગરિકોમાં ભારે આક્રોશ પ્રવર્તી રહ્યો છે, ત્યારે વહેલી તકે તંત્ર કડક પગલાં ભરે તેવી પ્રબળ લોકમાંગ ઉઠી છે.
