દેશની રાષ્ટ્રીય રાજધાની દિલ્હીમાં લાંબા સમયથી પ્રદૂષણના કહેરથી ત્રસ્ત રહેલા નાગરિકો માટે રાહતના સમાચાર સામે આવ્યા છે. બુધવારે દિલ્હીનો એર ક્વોલિટી ઇન્ડેક્સ (AQI) ૩૦૦ થી નીચે દર્શાવવામાં આવ્યો હતો, જે અગાઉના મંગળવારે પણ આ જ સ્થિતિમાં જોવા મળ્યો હતો. રાજધાનીના અનેક વિસ્તારોમાં હવાની ગુણવત્તામાં નોંધપાત્ર સુધારો થવાથી લોકોએ હાશકારો અનુભવ્યો છે. છેલ્લા કેટલાક દિવસોથી ઝેરી અને પ્રદૂષિત હવાના કારણે શ્વાસ લેવામાં પડતી મુશ્કેલીમાંથી હાલ પૂરતી મુક્તિ મળતી દેખાઈ રહી છે, જેના કારણે દિલ્હીવાસીઓએ રાહતનો શ્વાસ લીધો છે.
હવાની ગુણવત્તામાં સુધારો થવાની સાથે જ વહીવટી તંત્ર દ્વારા પણ કડક નિયમોમાં થોડી છૂટછાટ આપવામાં આવી છે. દિલ્હીમાં પ્રદૂષણનું સ્તર ઘટ્યા બાદ ગ્રેપ-૩ (GRAP-3) હેઠળ લાદવામાં આવેલા પ્રતિબંધોને સત્તાવાર રીતે હટાવી લેવામાં આવ્યા છે. ઉલ્લેખનીય છે કે ગ ગત ૬ નવેમ્બરના રોજ પ્રદૂષણની ગંભીર સ્થિતિને ધ્યાનમાં રાખીને ગ્રેપ-૩ ના નિયમો લાગુ કરવામાં આવ્યા હતા. જોકે, આગામી દિવસોમાં પ્રદૂષણની સ્થિતિ ફરીથી બગડે નહીં અને હવા વધુ ઝેરી ન બને તે માટે સાવચેતીના ભાગરૂપે હજુ પણ ગ્રેપ-૧ અને ગ્રેપ-૨ ના પ્રતિબંધો યથાવત રાખવામાં આવ્યા છે જેથી સ્થિતિ પર કાબૂ રાખી શકાય.
પ્રદૂષણના સ્તરમાં ઘટાડો થયો હોવા છતાં સ્વાસ્થ્ય નિષ્ણાતો અને તંત્ર દ્વારા નાગરિકોને કોઈપણ પ્રકારની બેદરકારી ન દાખવવાની કડક સલાહ આપવામાં આવી છે. ખાસ કરીને બાળકો, વડીલો અને મહિલાઓએ પોતાના સ્વાસ્થ્યનું વિશેષ ધ્યાન રાખવું જરૂરી છે. ઘરની બહાર નીકળતી વખતે માસ્કનો અવશ્ય ઉપયોગ કરવો તેમજ સુરક્ષિત અંતર અને સાવચેતીના પગલાં જાળવી રાખવા અનુરોધ કરવામાં આવ્યો છે, જેથી હવાની ગુણવત્તા સુધરવા છતાં નાગરિકોનું આરોગ્ય સુરક્ષિત રહી શકે.
