JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
ધર્મ

સંવત ૨૦૮૩માં કુલ પાંચ ગ્રહણો સર્જાશે, જાણો સૌરાષ્ટ્ર-ગુજરાતમાં કયું ગ્રહણ પળાશે

સંવત ૨૦૮૩માં કુલ પાંચ ગ્રહણો સર્જાશે, જાણો સૌરાષ્ટ્ર-ગુજરાતમાં કયું ગ્રહણ પળાશે
આગામી સંવત ૨૦૮૩ના વર્ષ દરમિયાન કુલ પાંચ ગ્રહણો થશે, જેમાં બે સૂર્યગ્રહણ અને ત્રણ ચંદ્રગ્રહણનો સમાવેશ થાય છે. જોકે, ધાર્મિક દ્રષ્ટિએ સૌરાષ્ટ્ર-ગુજરાતમાં માત્ર ૨ ઓગસ્ટના રોજ થનારું સૂર્યગ્રહણ જ વેધ અને નિયમો સાથે પાળવાનું રહેશે.

શાસ્ત્રી રાજદીપ જોશી (વેદાંત રત્ન, રાજકોટ) દ્વારા આપવામાં આવેલી ખગોળીય અને પંચાંગની ગણતરી મુજબ, સંવત ૨૦૮૩ના વર્ષમાં કુલ પાંચ ગ્રહણોનો યોગ બની રહ્યો છે. વર્ષના પ્રારંભે તા. ૦૬-૦૨-૨૦૨૭ના રોજ પોષ વદ અમાસના શનિવારે મકર રાશિમાં કંકણાકૃતિ સૂર્યગ્રહણ સર્જાશે. આ ગ્રહણ ભારતમાં દ્રશ્યમાન નહીં હોય, તેથી તેના ધાર્મિક નિયમો કે વેધ દેશમાં લાગુ પડશે નહીં, પરંતુ તે આર્જેન્ટિના, દક્ષિણ અમેરિકા અને એન્ટાર્કટિકા જેવા વિસ્તારોમાં જોવા મળશે. આ ઉપરાંત, તા. ૨૦-૦૨-૨૦૨૭ના રોજ મહા સુદ પૂનમે માંદ્ય (છાયા) ચંદ્રગ્રહણ થશે, જે પણ ભારતમાં નજરે પડવાનું ન હોવાથી ધાર્મિક દ્રષ્ટિએ પાળવાનું નથી.

વર્ષ દરમિયાન આવનાર અન્ય ગ્રહણોમાં તા. ૧૮-૦૭-૨૦૨૭ના રોજ અષાઢ સુદ પૂનમે વધુ એક માંદ્ય ચંદ્રગ્રહણ થશે. આ છાયા ચંદ્રગ્રહણ ગુજરાત સહિત સમગ્ર ભારતમાં દેખાશે પરંતુ તે માત્ર છાયા સ્વરૂપનું હોવાથી શાસ્ત્ર અનુસાર તેના કોઈ ખાસ ધાર્મિક નિયમો કે વેધ પાળવાના રહેતા નથી. ત્યારબાદ, તા. ૧૭-૦૮-૨૦૨૭ના રોજ શ્રાવણ સુદ પૂનમે પાંચમું અને વર્ષનું છેલ્લું માંદ્ય ચંદ્રગ્રહણ થશે, જે ભારતમાં ક્યાંય પણ જોવા મળશે નહીં અને તે મુખ્યત્વે બ્રાઝિલ, અમેરિકા, કેનેડા તથા ઓસ્ટ્રેલિયાના કેટલાક પ્રદેશોમાં જ નજરે પડશે.

સંવત ૨૦૮૩ના આ તમામ ગ્રહણો પૈકી સૌરાષ્ટ્ર અને ગુજરાતના લોકો માટે તા. ૦૨-૦૮-૨૦૨૭ના રોજ અષાઢ વદ અમાસ અને સોમવારે થનારું ખગ્રાસ સૂર્યગ્રહણ જ સૌથી મહત્વનું રહેવાનું છે. કર્ક રાશિ તેમજ પુષ્ય અને આશ્લેષા નક્ષત્રમાં થનારું આ સૂર્યગ્રહણ ભારતના મોટાભાગના પ્રદેશોમાં ખંડગ્રાસ સ્વરૂપે દેખાશે. બપોરે ૧:૦૦ વાગ્યાથી શરૂ થઈને સાંજે ૬:૧૩ વાગ્યા સુધી ચાલનારા આ સૂર્યગ્રહણના કારણે સૌરાષ્ટ્ર-ગુજરાતમાં ધાર્મિક દ્રષ્ટિએ વેધ અને ગ્રહણના તમામ નિયમોચુસ્તપણે પાળવાના રહેશે. આ ગ્રહણ ભારત ઉપરાંત સાઉદી અરેબિયા, સ્પેન, યુરોપ અને આફ્રિકાના વિવિધ વિસ્તારોમાં પણ જોવા મળશે.

LATEST ARTICLES