JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
દેશ-વિદેશ

વૈશ્વિક વેપાર સંરક્ષણવાદ સામે ઝીન અને પુતિનની લાલ આંખ, અમેરિકી રાષ્ટ્રપતિ ટ્રમ્પ સાથેની મહત્ત્વપૂર્ણ બેઠક અગાઉ ગરમાયું રાજકારણ

વૈશ્વિક વેપાર સંરક્ષણવાદ સામે ઝીન અને પુતિનની લાલ આંખ, અમેરિકી રાષ્ટ્રપતિ ટ્રમ્પ સાથેની મહત્ત્વપૂર્ણ બેઠક અગાઉ ગરમાયું રાજકારણ
ચીનના શેનઝેન શહેરમાં યોજાયેલી એશિયા-પેસિફિક ઈકોનોમિક કોઓપરેશન (APEC) સમિટમાં રશિયા અને ચીનના સર્વોચ્ચ નેતાઓએ પશ્ચિમી દેશોની નીતિઓની આકરી ટીકા કરી છે. અમેરિકી રાષ્ટ્રપતિ ડોનાલ્ડ ટ્રમ્પની આગમન પૂર્વે જ આ વૈશ્વિક નેતાઓએ મુક્ત વેપારના સમર્થનમાં સૂર પુરાવ્યો છે.

ચીનના ટેક હબ ગણાતા શેનઝેન ખાતે એશિયા-પેસિફિક ઈકોનોમિક કોઓપરેશન (APEC) સમિટનો પ્રારંભ થઈ ચૂક્યો છે, જ્યાં ચીનના રાષ્ટ્રપતિ શી જિનપિંગ અને રશિયાના રાષ્ટ્રપતિ વ્લાદિમીર પુતિને પશ્ચિમી દેશો સામે મોરચો ખોલ્યો છે. શી જિનપિંગે વૈશ્વિક સ્તરે વેપાર સંરક્ષણવાદનો વિરોધ કરતાં વિશ્વ વેપાર સંસ્થા (WTO) આધારિત નિયમબદ્ધ વેપારી પ્રણાલીને મજબૂત બનાવવાની હિમાયત કરી હતી. બીજી તરફ, રશિયાના રાષ્ટ્રપતિ પુતિને પણ પશ્ચિમી દેશો દ્વારા લાદવામાં આવેલા આર્થિક પ્રતિબંધોની આકરીી ટીકા કરી હતી. આ બંને દિગ્ગજ નેતાઓના નિવેદનોથી વૈશ્વિક રાજકારણમાં ગરમાવો આવી ગયો છે અને તે વૈશ્વિક મંચ પર ચીનને એક સ્થિર ભાગીદાર તરીકે પ્રસ્તુત કરવાનો પ્રયાસ હોવાનું મનાઈ રહ્યું છે.

આ શિખર સંમેલન એવા સમયે યોજાઈાઈ રહ્યું છે જ્યારે અમેરિકી રાષ્ટ્રપતિ ડોનાલ્ડ ટ્રમ્પ એશિયાના પ્રવાસે છે અને મનિલામાં પ્રાદેશિક સહયોગીઓ સાથેની મુલાકાત બાદ ચીન આવી પહોંચ્યા છે. એરપોર્ટ પર ચીનના રાષ્ટ્રપતિ શી જિનપિંગે ટ્રમ્પનું ઉષ્માભર્યું સ્વાગત કર્યું હતું અને ત્યારબાદ ત્રણેય નેતાઓ APEC સમિટના સ્થળે એકાંત બેઠક, ગ્રૂપ ફોટો અને ભોજન સમારોહમાં જોડાયા હતા. આગામી ગુરુવારે યોજાનારી આ ત્રિપાક્ષીય બેઠકને વર્ષ 1945ની ઐતિહાસિક 'યાલ્ટા કોન્ફરન્સ' સાથે સરખાવવામાં આવી રહી છે, કારણ કે આ બેઠકમાં રશિયા-યુક્રેન યુદ્ધ, ઈરાન મુદ્દો, આર્ટિફિશિયલ ઈન્ટેલિજન્સ (AI) અને પરમાણુ શસ્ત્રો જેવા અત્યંત સંવેદનશીલ વિષયો પર ચર્ચા થવાની શક્યતા છે.

આ ઉચ્ચ સ્તરીય બેઠકને લઈને યુરોપ અને એશિયાના કેટલાક દેશોમાં ચિંતાનું મોજું ફરી વળ્યું છે કારણ કે તેમને ડર છે કે વિશ્વની આ મહાસત્તાઓ નાના દેશોના હિતોને અવગણીને કોઈ મોટા નિર્ણયો લઈ શકે છે. દરમિયાન, ક્રિમલિનના જણાવ્યા અનુસાર, અમેરિકી રાષ્ટ્રપતિ ટ્રમ્પ અને રશિયન રાષ્ટ્રપતિ પુતિન વચ્ચે સમિટ દરમિયાન ઔપચારિક દ્વિપક્ષીય બેઠકનું આયોજન ન હોવા છતાં બંને નેતાઓ વચ્ચે અનૌપચારિક અને સઘન વાતચીત થવાની પૂરી સંભાવના છે. વૈશ્વિક વેપાર, શક્તિશાળી વિદેશનીતિ અને આંતરરાષ્ટ્રીય સુરક્ષાના સમીકરણો વચ્ચે યોજાઈ રહેલી આ બેઠક આગામી સમયમાં વૈશ્વિક રાજનીતિની દિશા નક્કી કરવામાં સીમાચિહ્નરૂપ સાબિત થઈ શકે છે.

LATEST ARTICLES