JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
સ્પોર્ટ્સ

તમિલનાડુ સરકારનું મોટું પગલું: ચેન્નાઈમાં ઓલિમ્પિક સિટી અને પાંચ સ્થળોએ સેન્ટર ઓફ એક્સેલન્સ રચાશે

Jamnagar Mirror
તમિલનાડુ સરકારે ચેન્નાઈના સેમ્માન્ચેરી ખાતે ૧૨૪ એકરમાં અત્યાધુનિક ઓલિમ્પિક સિટી અને રાજ્યના પાંચ અન્ય જિલ્લાઓમાં ઓલિમ્પિક સેન્ટર ઓફ એક્સેલન્સ વિકસાવવાની પ્રક્રિયા શરૂ કરી દીધી છે. પબ્લિક વર્ક્સ ડિપાર્ટમેન્ટે (PWD) આ મહત્ત્વાકાંક્ષી પ્રોજેક્ટ માટે પ્રતિષ્ઠિત આર્કિટેક્ચરલ ફર્મ્સ પાસેથી પ્રપોઝલ મંગાવ્યા છે.

વર્ષોથી માત્ર કાગળ પર જ સીમિત રહેલા તમિલનાડુ સરકારના મહત્ત્વાકાંક્ષી 'ઓલિમ્પિક સિટી' પ્રોજેક્ટને હવે વાસ્તવિકતામાં ફેરવવાની દિશામાં નક્કર વેગ મળ્યો છે. રાજ્ય સરકારે ચેન્નાઈના સેમ્માન્ચેરી ખાતે ૧૨૪.૩૧ એકર વિશાળ જમીન પર ઓલિમ્પિક સિટી વિકસાવવાની પ્રક્રિયાનો આરંભ કર્યો છે. આ પ્રોજેક્ટ અંતર્ગત પબ્લિક વર્ક્સ ડિપાર્ટમેન્ટે (PWD) દેશભરની અગ્રેસર આર્કિટેક્ચરલ ફર્મ્સ અને કન્સલ્ટન્સીને માસ્ટર પ્લાન તૈયાર કરવા તેમજ અત્યાધુનિક ડિઝાઈન અને પ્રોજેક્ટ મેનેજમેન્ટ માટે આગળ આવવા આમંત્રણ પાઠવ્યું છે. અગાઉની સરકાર દ્વારા નક્કી કરવામાં આવેલી આ જ જમીન પર આ પ્રોજેક્ટ આકાર પામી રહ્યો છે, જેને વર્તમાન સરકાર દ્વારા વધુ વ્યાપક અને આધુનિક સ્વરૂપમાં પુનર્ગઠિત કરવામાં આવ્યો છે.

ઓલિમ્પિક સિટી ઉપરાંત રાજ્યના યુવા પ્રતિભાઓને વૈશ્વિક સ્તરની તાલીમ પૂરી પાડવા માટે પાંચ અલગ-અલગ શહેરોમાં 'ઓલિમ્પિક સેન્ટર ઓફ એક્સેલન્સ' સ્થાપવાની પણ ભવ્ય યોજના છે. આ સેન્ટર્સ માટે ચેન્નાઈમાં ૧૫ એકર, તિરુવન્નામલાઈમાં ૧૦ એકર, કોઈમ્બતુરમાં ૨૦ એકર, નાગપટ્ટિનમમાં ૧૨ એકર અને પરમાકુડીમાં ૭.૫ એકર મળીને કુલ ૬૪.૫ એકર જમીન ફાળવવામાં આવી છે. આ તમામ કેન્દ્રો પર ખેલાડીઓ માટે વિશ્વ કક્ષાની રમતગમતની સુવિધાઓ, અત્યાધુનિક સ્ટેડિયમ અને તાલીમ ભવનોનું નિર્માણ કરવામાં આવશે, જેના માટે પણ PWD દ્વારા માસ્ટર પ્લાનિંગ અને સ્ટ્રક્ચરલ ડિઝાઈનિંગની પ્રક્રિયા હાથ ધરવામાં આવી છે.

સ્પોર્ટ્સ ડેવલપમેન્ટ ઓથોરિટી ઓફ તમિલનાડુ (SDAT) ના અધિકારીઓના જણાવ્યા અનુસાર, આ પ્રોજેક્ટ રાજ્યમાં રમતગમતની સંસ્કૃતિને કાયાપલટ કરવામાં અને આંતરરાષ્ટ્રીય સ્તરે દેશનું નામ રોશન કરી શકે તેવા ઓલિમ્પિયન તૈયાર કરવામાં સીમાચિહ્નરૂપ સાબિત થશે. સરકારની આ દીર્ઘદ્રષ્ટિથી માત્ર રમતવીરોને જ નહીં, પરંતુ સમગ્ર રાજ્યના યુવાનોને ઉત્તમ પ્લેટફોર્મ મળશે. આંતરરાષ્ટ્રીય ધોરણોને ધ્યાનમાં રાખીને તૈયાર થનાર આ પ્રોજેક્ટ્સથી તમિલનાડુ આગામી સમયમાં ભારતનું અગ્રણી સ્પોર્ટ્સ હબ બનીને ઉભરશે તેવી પ્રબળ સંભાવના છે.

LATEST ARTICLES