મધ્ય પૂર્વમાં ચાલી રહેલા તણાવ વચ્ચે ઈરાનના ઈસ્લામિક રિવોલ્યુશનરી ગાર્ડ કોર (IRGC) દ્વારા એક મોટો દાવો કરવામાં આવ્યો છે. સંગઠને જણાવ્યું હતું કે તેણે કેશ્મ ટાપુ ઉપર ઉડી રહેલા અમેરિકાના એક MQ-1 ડ્રોનને પોતાની અદ્યતન એરોસ્પેસ રક્ષા પ્રણાલીની મદદથી અટકાવીને સફળતાપૂર્વક નષ્ટ કરી દીધું છે. ઈરાની સૈન્ય પ્રશાસનના જણાવ્યા અનુસાર, આ ડ્રોન જાસૂસી અને લડાયક હેતુઓ માટે સક્રિય હતું, જેને સમયસર તોડી પાડીને દુશ્મન દેશની ગુપ્તચર પ્રવૃત્તિઓને નિષ્ફળ બનાવવામાં આવી છે. આ ઘટનાને ઈરાનની સૈન્ય ક્ષમતાની મોટી સફળતા તરીકે જોવામાં આવી રહી છે.
આ ડ્રોન હુમલાની સાથોસાથ શનિવારે હોર્મુઝ સ્ટ્રેટ (હોર્મુઝ ખાડી) ખાતે અત્યંત ચિંતાજનક ઘટના સામે આવી હતી, જ્યાં બે મોટા તેલ ટેન્કરોમાં ભીષણ આગ લાગી હતી. સ્થાનિક અહેવાલો મુજબ, આ ટેન્કરો પ્રતિબંધિત જળક્ષેત્રમાં દરિયાઈ સુરંગો (સી માઈન્સ) અથવા મ્યુનિશિયન્સ સાથે અથડાવાને કારણે અકસ્માતનો ભોગ બન્યા હતા. છેલ્લા ચોવીસ કલાકમાં જહાજોને નિશાન બનાવવાની કે દરિયાઈ સુરંગો સાથે અથડાવાની પાંચમી ઘટના સામે આવી છે, જેના કારણે દરિયાઈ માર્ગે થતી અવરજવર અને નૌકાદળની સુરક્ષા સામે મોટા પ્રશ્નાર્થ ચિન્હો સર્જાયા છે.
હોર્મુઝ ખાડી એ વૈશ્વિક સ્તરે તેલ વેપાર માટેનો સૌથી મહત્વપૂર્ણ અને વ્યૂહાત્મક જળમાર્ગ માનવામાં આવે છે. આ ક્ષેત્રમાં સતત વધી રહેલી હિંસક ઘટનાઓ અને સૈન્ય ઘર્ષણને કારણે આંતરરાષ્ટ્રીય સ્તરે ભારે ચિંતાનું મોજું ફરી વળ્યું છે. વૈશ્વિક બજારમાં તેલ પુરવઠાને કોઈ મોટી અસર ન પહોંચે તે માટે પ્રાદેશિક અને વૈશ્વિક સુરક્ષા એજન્સીઓ સમગ્ર પરિસ્થિતિ પર અત્યંત સતર્કતાથી નજર રાખી રહી છે. જો આ તણાવ યથાવત રહેશે તો આગામી દિવસોમાં આંતરરાષ્ટ્રીય વ્યાપારિક સંબંધો અને દરિયાઈ પરિવહન પર ગંભીર અસરો પડી શકે છે.
