মধ্য પૂર્વમાં ચાલી રહેલા તણાવ વચ્ચે ઈરાનની સંસદના સ્પીકર અને ટોચના વાટાઘાટકાર મોહમ્મદ બઘેર ગાલિબાફે અમેરિકી રાષ્ટ્રપતિ ડોનાલ્ડ ટ્રમ્પને આક્રમક અંદાજમાં ચેતવણી ઉચ્ચારી છે. સંસદના ખુલ્લા સત્રમાં બોલતા તેમણે જણાવ્યું હતું કે ઈરાનને હવે કોઈ ફરક નથી પડતો કે અમેરિકા વાટાઘાટોનો રસ્તો પસંદ કરે કે યુદ્ધનો. જો વોશિંગ્ટન ઈરાનની સાત વાજબી શરતો સ્વીકારવા તૈયાર થાય તો જ સમજૂતીના દ્વાર ખુલ્લા રહેશે. આ નિવેદન એવા સમયે આવ્યું છે જ્યારે ટ્રમ્પ પ્રશાસન એક તરફ નવા હુમલાઓની ધમકી આપી રહ્યું છે અને બીજી તરફ તણાવ ઓછો કરવાના વિકલ્પો પણ વિચારી રહ્યું છે.
આ સંઘર્ષની શરૂઆત ગત 28 ફેબ્રુઆરીએ થઈ હતી જ્યારે અમેરિકા અને ઈઝરાયેલે સંયુક્ત હુમલામાં ઈરાનના સર્વોચ્ચ નેતા અલી ખામેનેઈ અને વરિષ્ઠ લશ્કરી કમાન્ડરોને ખતમ કરી નાખ્યા હતા. જેના જવાબમાં તેહરાને મધ્ય પૂર્વમાં આવેલા અમેરિકી સૈનિક મથકોને નિશાન બનાવ્યા હતા અને વિશ્વના સૌથી મહત્વપૂર્ણ ઊર્જા માર્ગ ગણાતા હોર્મુઝ સ્ટ્રેટને બંધ કરી દીધો હતો, જેના કારણે વૈશ્વિક બજારમાં ક્રૂડ ઓઈલના ભાવ આસમાને પહોંચી ગયા હતા. ત્યારબાદ 17 જૂનના રોજ ટ્રમ્પ અને ઈરાનના રાષ્ટ્રપતિ મસૂદ પેઝેશ્કિયાને યુદ્ધવિરામ માટે 14 મુદ્દાના કરાર પર હસ્તાક્ષર કર્યા હતા, પરંતુ જુલાઈની શરૂઆતમાં ટ્રમ્પે આ કરારને રદબાતલ જાહેર કરતા બંને દેશો વચ્ચે ફરીથી અવિશ્વાસનું વાતાવરણ ઊભું થયું છે.
વર્તમાન પરિસ્થિતિમાં અમેરિકી રાષ્ટ્રપતિ ડોનાલ્ડ ટ્રમ્પ સાઉદી અરેબિયાના ક્રાઉન પ્રિન્સ મોહમ્મદ બિન સલમાન અને તુર્કીના રાષ્ટ્રપતિ રેસેપ તૈયપ એર્દોગન સહિતના સહયોગીઓના દબાણ હેઠળ છે, જેમણે ઈરાન સામે પૂર્ણ કક્ષાનું યુદ્ધ ફરી શરૂ ન કરવા વિનંતી કરી છે. તેમ છતાં, અમેરિકી સેના કોઈપણ પરિસ્થિતિને પહોંચી વળવા માટે મધ્ય પૂર્વમાં પોતાની સૈન્ય તાકાત વધારી રહી છે અને ત્રીજી એરક્રાફ્ટ કેરિયર પણ તૈનાત કરવામાં આવી રહી છે. ઈરાને પણ સ્પષ્ટ કરી દીધું છે કે તે લાંબા સમય સુધી અનિશ્ચિતતાની સ્થિતિમાં નહીં રહે અને કોઈપણ આક્રમક પગલાનો જડબાતોડ જવાબ આપવામાં આવશે.
