સૂત્રોના જણાવ્યા અનુસાર, આગામી ડિસેમ્બર મહિનાના પ્રથમ સપ્તાહમાં સંસદનું શિયાળુ સત્ર શરૂ થવાની પ્રબળ સંભાવના છે. સરકાર આ સત્ર દરમિયાન લોકસભા અને રાજ્ય વિધાનસભામાં મહિલાઓ માટે ૩૩ ટકા અનામત સુનિશ્ચિત કરવા માટેનું સીમાંકન સંલગ્ન બંધારણીય સુધારા બિલ પસાર કરાવવા પર વિશેષ ભાર મૂકી રહી છે. આ પ્રસ્તાવિત કાયદા હેઠળ વર્ષ ૨૦૨૯ની લોકસભા ચૂંટણી પહેલા સીમાંકન દ્વારા લોકસભાની બેઠકોની સંખ્યા ૫૪૩ થી વધારીને મહત્તમ ૮૫૦ સુધી કરવામાં આવી શકે છે. આ બેઠક વધારાને લઈને દક્ષિણ ભારતીય રાજ્યોની ચિંતાઓ દૂર કરવા માટે ૧૯૭૧ની વસ્તી ગણતરીના આધારે રાજ્યોનો આંતર-રાજ્ય હિસ્સો જાળવી રાખીને તમામ રાજ્યોમાં બેઠકો ૫૦ ટકા સુધી વધારવાના સૂત્ર પર પણ વિચારણા ચાલી રહી છે.
જોકે, આ બંધારણીય સુધારા બિલને પસાર કરવા માટે સરકાર સામે સંખ્યાબળનો મોટો પડકાર ઉભો છે કારણ કે કોઈપણ બંધારણીય સુધારા માટે હાજર અને મતદાન કરતા સભ્યોના ઓછામાં ઓછા બે-તૃતીયાંશ સમર્થનની જરૂર પડે છે. વર્તમાન લોકસભામાં જો તમામ ૫૪૦ સાંસદો મતદાન કરે તો આ આંકડો ૩૬૧ થાય છે, જ્યારે શાસક એનડીએ ગઠબંધન પાસે ૩૨૦ સભ્યો છે અને આ બિલ પાસ કરાવવા માટે તેણે વિપક્ષના ટેકા પર નિર્ભર રહેવું પડશે. બીજી તરફ, ચોમાસુ સત્રને સત્તાવાર રીતે પૂરું ન કરવાના નિર્ણયથી સરકારે ટૂંકી નોટિસ પર સત્ર બોલાવવાનો વિકલ્પ ખુલ્લો રાખ્યો છે, જેથી જરૂર પડ્યે ઓછા સમયમાં વિશેષ બેઠક બોલાવી શકાય.
આ ધારાસાકીય કાર્યવાહીની સાથે જ સંસદમાં સરકાર અને વિપક્ષ વચ્ચે જોરદાર ઘર્ષણ થવાના એંધાણ પણ વર્તાઈ રહ્યા છે. વિપક્ષી પક્ષો દ્વારા મતદાર યાદીના વિશેષ સઘન પુનરાવર્તન (SIR) મુદ્દે સરકાર વિરુદ્ધ વિરોધ પ્રદર્શન તેજ કરવામાં આવ્યા છે અને મુખ્ય ચૂંટણી કમિશનરના રાજીનામાની માંગ કરવામાં આવી રહી છે. આ વિરોધ પ્રદર્શનો શિયાળુ સત્રની કાર્યવાહીને પણ અસર કરી શકે છે. શાસક પક્ષના એક સાંસદે સ્પષ્ટ કર્યું છે કે ગૃહની કાર્યવાહી સુચારૂ રૂપે ચાલે નહીં ત્યાં સુધી બંધારણીય સુધારા બિલ પર ચર્ચા અને મતદાન કરવું મુશ્કેલ બનશે, જેના કારણે આગામી સત્ર અત્યંત તોફાની રહેવાના સંકેતો છે.
