ગત ૧૧ નવેમ્બરના રોજ અમદાવાદના પોશ ગણાતા શીલજ વિસ્તારમાં એક કરુણ અકસ્માત સર્જાયો હતો, જેમાં બાપુનગરના ભાજપના ધારાસભ્ય દિનેશ કુશવાહના ભત્રીજા રાઘવેન્દ્ર કુશવાહે પોતાની પૂરઝડપે દોડતી લક્ઝુરિયસ રેન્જ રોવર કારથી હર્ષદકુમાર નામના ૩૫ વર્ષીય નિર્દોષ બાઈકચાલકને ટક્કર મારતા તેનું ઘટનાસ્થળે જ કમકમાટીભર્યું મોત નીપજ્યું હતું. આ ગંભીર અકસ્માત સર્જ્યા બાદ આરોપી ઘટનાસ્થળેથી ફરાર થઈ ગયો હતો. જો કે, વગદાર રાજકીય પૃષ્ઠભૂમિ ધરાવતા આ આરોપીને બચાવવા માટે સ્થાનિક પોલીસે શરૂઆતથી જ શંકાસ્પદ અને ઢીલી નીતિ અપનાવી હોવાનું સ્પષ્ટ દેખાઈ રહ્યું છે. અકસ્માતની ગંભીરતા હોવા છતાં પોલીસે આરોપીને પકડવા માટે ૧૭ કલાક સુધી કોઈ ગંભીરતા દાખવી નહોતી અને અંતે સાક્ષીઓની માહિતીના આધારે તેના ઘરેથી ધરપકડ કરવામાં આવી હતી.
પોલીસ અને આરોપીના નિવેદનોમાં મોટાપાયે વિરોધાભાસ જોવા મળ્યો છે, જે સમગ્ર તપાસને શંકાના ઘેરામાં ધકેલે છે. એક તરફ ડીવાયએસપીએ બ્લડ ટેસ્ટ અંગેના સવાલોના જવાબ આપવાનું ટાળ્યું હતું, તો બીજી તરફ આરોપીએ મીડિયા સમક્ષ અગાઉ જ બ્લડ ટેસ્ટ થઈ ગયાનો દાવો કર્યો હતો. પોતાની ભૂલ છુપાવવા અને નશાની પુષ્ટિ ન થઈ શકે તેવા બદઈરાદા સાથે પોલીસે ઘટનાના પૂરા ૩૦ કલાક બાદ દેખાડા ખાતર આરોપીનું બ્લડ સેમ્પલ લીધું હતું. આટલું જ નહીં, ગંભીર ગુનાના આરોપી સામે સામાન્ય કલમો લગાવીને માત્ર સળંગ બે દિવસમાં ૨૫થી ૨૬ કલાકની નામમાત્ર પૂછપરછ બાદ તેને તાત્કાલિક જામીન પર મુક્ત પણ કરી દેવામાં આવ્યો છે.
હવે આ કેસમાં પોલીસ દ્વારા કારની સાચી ગતિ જાણવા માટે આરટીઓ, એફએસએલ અને રેન્જ રોવર કંપની પાસેથી ટેકનિકલ રિપોર્ટ્સ માંગવામાં આવ્યા છે, તેમજ આરોપીના કૉલ ડિટેલ રેકોર્ડ (CDR) તપાસવાની વાતો થઈ રહી છે. અકસ્માત સર્જાયા પછી ૧૭ કલાક સુધી આરોપી ક્યાં અને કોના સંસર્ગમાં હતો તે બાબત ડરના બહાના હેઠળ દબાવવાનો પ્રયાસ થઈ રહ્યો છે. સમગ્ર ઘટનાક્રમમાં પોલીસની આ પ્રકારની છૂટછાટ અને પ્રશાસનિક ઉદાસીનતા સાબિત કરે છે કે રાજકીય દબાણ હેઠળ એક નિર્દોષ યુવકના પરિવારને ન્યાય અપાવવાને બદલે પ્રભાવશાળી આરોપીને છાવરવાના પૂરતા પ્રયાસો ચાલી રહ્યા છે.
