જામનગરની ભાગોળે આવેલા હાપા માર્કેટિંગ યાર્ડમાં દિવાળીના લાંબા વેકેશન બાદ શુક્રવારે લાભ પાંચમ નિમિત્તે પરંપરાગત રીતે શુભ મુહૂર્તમાં હરાજીની પ્રક્રિયા શરૂ કરવામાં આવી હતી. નવા વર્ષના પ્રથમ દિવસથી જ યાર્ડમાં ખેડૂતોનો ધસારો જોવા મળ્યો હતો અને કુલ 828 જેટલા ખેડૂતો પોતાની ઉપજ વેચવા માટે હાપા યાર્ડ ખાતે આવ્યા હતા. વેકેશન પૂરું થતાની સાથે જ બજાર શરૂ થવાથી વેપારીઓ અને ખેડૂતો બંનેમાં ઉત્સાહનો માહોલ જોવા મળ્યો હતો અને કાળજીપૂર્વક ખરીદ-વેચાણની કામગીરી પાર પાડવામાં આવી હતી.
આજના દિવસે યાર્ડમાં મુખ્યત્વે મગફળી અને કપાસની ભારે આવક જોવા મળી હતી, જેમાં મગફળીની સૌથી વધુ 17,500 મણ અને કપાસની 5,383 મણ જેટલી જંગી આવક નોંધાઈ હતી. આ ઉપરાંત ચણા, જીરું, અજમો અને ડુંગળી જેવા અન્ય ખેતી પાકોની પણ સારી એવી આવક થઈ હતી. ભાવની વાત કરીએ તો, મગફળી 66 નંબરના ભાવ પ્રતિ મણ રૂ. 1600 થી 2300 અને મગફળી 9 નંબરના ભાવ રૂ. 1700 થી 2725 સુધીના બોલાયા હતા, જ્યારે કપાસના ભાવ પ્રતિ મણ રૂ. 1790 થી 1925 વચ્ચે રહ્યા હતા.
લાભ પાંચમના દિવસે કુલ 19,159 ગુણી જણસોની આવક સામે 14,656 ગુણી જેટલી જણસોનું સફળતાપૂર્વક વેચાણ થયું હતું. ઉલ્લેખનીય છે કે દિવાળી પૂર્વે પણ એક જ દિવસમાં આશરે 250 જેટલા વાહનો દ્વારા 17,000 ગુણી મગફળી ઠલવાઈ હતી, જેના કારણે ભારે ભીડને લીધે કામગીરી અસ્થાયી રૂપે અટકાવવી પડી હતી. હવે વેકેશન બાદ ફરીથી બજાર ધમધમતું થવાથી આગામી દિવસોમાં મગફળી અને કપાસ સહિતની તમામ જણસોની આવકમાં વધુ નોંધપાત્ર વધારો થવાની પ્રબળ સંભાવના વ્યક્ત કરવામાં આવી રહી છે.
