તામિલનાડુની સરકારી મેડિકલ કોલેજો અને ૧૧ નવી સરકારી હોસ્પિટલો માટે એક અત્યંત રાહતજનક સમાચાર સામે આવ્યા છે. નેશનલ મેડિકલ કમિશન (NMC) દ્વારા રાજ્યમાં અનુસ્નાતક (PG) મેડિકલ અભ્યાસક્રમો માટે વધુ ૪૨૪ બેઠકો ઉમેરવાની સત્તાવાર મંજૂરી આપી દેવામાં આવી છે. આગામી ૧૭ નવેમ્બરથી શરૂ થનાર રાજ્ય કક્ષાની કાઉન્સિલિંગના બીજા રાઉન્ડ પહેલા જ આ બેઠકોનો ઉમેરો થવાથી તબીબી અભ્યાસ કરવા ઈચ્છુક ઉમેદવારો માટે પસંદગીના અનેક નવા ક્ષેત્રો ખુલી ગયા છે. આ વધારા સાથે હવે રાજ્યમાં સરકારી પીજી બેઠકોની કુલ સંખ્યા ૨,૩૫૮ થી વધીને સીધી ૨,૭૮૨ પર પહોંચી ગઈ છે, જે તામિલનાડુના તબીબી શિક્ષણ ક્ષેત્રે એક મોટું સીમાચિહ્ન સાબિત થશે.
નક્કી કરાયેલા નિયમો અનુસાર, રાજ્ય દર વર્ષે પોતાની કુલ બેઠકોમાંથી અંદાજે ૫૦ ટકા બેઠકો ઓલ ઈન્ડિયા કાઉન્સિલિંગ માટે કેન્દ્ર સરકારને ફાળવે છે. આ વર્ષે કેન્દ્ર સરકાર હસ્તક કુલ ૧,૩૨૫ બેઠકો જશે, જ્યારે બાકી બચેલી ૧,૪૫૭ બેઠકો પર મેડિકલ એજ્યુકેશન ડિરેક્ટોરેટ હેઠળની સ્ટેટ સિલેક્શન કમિટી દ્વારા સિંગલ-વિન્ડો ઓનલાઈન કાઉન્સિલિંગ પ્રક્રિયા હાથ ધરવામાં આવશે. એનેસ્થેસિયા, ઓર્થોપેડિક્સ, જનરલ મેડિસીન અને સર્જરી જેવા મહત્વપૂર્ણ ક્લિનિકલ વિષયોમાં આ વધારાની બેઠકો ઉમેરવામાં આવી છે. તામિલનાડુ ડૉ. એમ.જી.આર. મેડિકલ યુનિવર્સિટી દ્વારા માન્યતા (એફિલિએશન) મળ્યા બાદ તરત જ આ બેઠકોને સીટ મેટ્રિક્સમાં સમાવિષ્ટ કરવામાં આવશે, જેની પ્રક્રિયા ટૂંક સમયમાં જ પૂર્ણ થવાની અપેક્ષા છે.
આ શૈક્ષણિક વિસ્તરણ માત્ર વિદ્યાર્થીઓ માટે બેઠકોની તકો જ નહીં વધે, પરંતુ નવી સ્થપાયેલી કોલેજોને નિષ્ણાત ડોક્ટરોની ટીમ તૈયાર કરવામાં અને દર્દીઓને શ્રેષ્ઠ સ્વાસ્થ્ય સેવાઓ પૂરી પાડવામાં પણ ખૂબ જ મદદરૂપ બનશે. સિલેક્શન કમિટીના ડૉ. વી. લોકનાયકીના જણાવ્યા અનુસાર, જિલ્લા સ્તરે પીજી અને સુપર-સ્પેશિયાલિટી વિભાગો શરૂ થવાથી રાજ્યના દૂર-દૂરના વિસ્તારોમાં પણ ઉચ્ચ સ્તરીય સારવાર સહીતની તમામ સ્વાસ્થ્ય સેવાઓનું સમાન વિતરણ સુનિશ્ચિત કરી શકાશે. આગામી કાઉન્સિલિંગ રાઉન્ડ પહેલા આ મહત્વપૂર્ણ નિર્ણય લેવાતા તબીબી ક્ષેત્રે ઉત્સાહનું વાતાવરણ જોવા મળી રહ્યું છે.
