ભગવાન બિરસા મુંડાની ૧૫૧મી જન્મજયંતીની ભવ્ય ઉજવણીના ભાગરૂપે પંચમહાલ જિલ્લા વહીવટી તંત્ર દ્વારા એક પ્રેરણાદાયી પહેલ કરવામાં આવી છે. જનજાતિય ગૌરવ દિવસની ઉજવણી અન્વયે જિલ્લાભરમાં મહાપુરુષો અને દેશના સ્વતંત્ર સેનાનીઓને સ્મરણાંજલિ રૂપે વિશેષ પ્રતિમા સ્વચ્છતા અભિયાન હાથ ધરવામાં આવ્યું હતું. આ અભિયાનનો મુખ્ય ઉદ્દેશ્ય આપણા રાષ્ટ્રીય નાયકોના યોગદાનને યાદ કરી તેમના સ્મારકો અને પ્રતિમાઓ આસપાસ સ્વચ્છતા જાળવવાનો તેમજ નાગરિકોમાં સફાઈ પ્રત્યે જાગૃતિ ફેલાવવાનો હતો. વહીવટી તંત્રના માર્ગદર્શન હેઠળ યોજાયેલા આ કાર્યક્રમમાં સ્થાનિક સ્તરે પણ ભારે ઉત્સાહ જોવા મળ્યો હતો.
ગોધરા શહેરમાં આ અભિયાન હેઠળ અનેક મહત્વપૂર્ણ સ્થળોએ સઘન સફાઈ કામગીરી હાથ ધરવામાં આવી હતી. સર્કિટ હાઉસ સામે આવેલી ડૉ. બાબાસાહેબ આંબેડકરની પ્રતિમા, સરદાર નગર ખંડસ્થિત સરદાર પટેલ સ્ટેચ્યુ, એ.પી. ઓફિસ સામે ગાંધીજીની પ્રતિમા તેમજ ગોવિંદ ગુરુ યુનિવર્સિટી (વિંઝોલ) ખાતે આવેલી ગોવિંદ ગુરુની પ્રતિમાની આસપાસનો સંપૂર્ણ વિસ્તાર સ્વચ્છ કરવામાં આવ્યો હતો. આ ઉપરાંત મામલતદાર કચેરી, ડેરોલ સ્ટેશન ચોકડી, દેલોલ અને ઘોઘંબાના બિરસા મુંડા સર્કલ સહિતના વિસ્તારોમાં પણ વહીવટી કર્મચારીઓ અને નાગરિકો દ્વારા શ્રમદાન કરવામાં આવ્યું હતું.
માત્ર ગોધરા જ નહીં પરંતુ રણજીતનગર, વડેખ પ્રાથમિક શાળા, જાંબુઘોડાના દાંડિયાપુરા સ્થિત સંત રૂપસિંહ નાયક પ્રાથમિક શાળા તેમજ શહેરા તાલુકાની અણીયાદ ચોકડી, સિવિલ હોસ્પિટલ, સિંધ ચોકડી, નાડા બાયપાસ અને મોરવા હડફ તાલુકાની રજાયતા પ્રાથમિક શાળા તથા સુલિયાત ચોકડી જેવા ગ્રામ્ય અને શહેરી વિસ્તારોમાં પણ પ્રતિમાઓ અને તેના પરિસરોમાં સાફ-સફાઈની વિશેષ કામગીરી કરવામાં આવી હતી. આ નિર્ધારિત શૃંખલાબદ્ધ કાર્યક્રમો અંતર્ગત ઉપસ્થિત જનપ્રતિનિધિઓ અને અધિકારીઓ દ્વારા વિશેષ રૂપે સાધુસંતોના નિવાસસ્થાને જઈને તેમનું સન્માન પણ કરવામાં આવ્યું હતું, જેણે આ સામાજિક અભિયાનમાં ઉત્સવનું રૂપાંતર કરી દીધું હતું.
