વાવ અને થરાદ પંથકમાં આયોજિત ઠાકોર સમાજના સ્નેહ મિલન કાર્યક્રમે આખા રાજકીય વર્તુળનું ધ્યાન ખેંચ્યું હતું. નવા વર્ષના પર્વ નિમિત્તે યોજાયેલા આ મેળાવડામાં કોંગ્રેસ અને ભાજપના દિગ્ગજ નેતાઓ ભેગા થતા તે એક રાજકીય મંચ કરતા સામાજિક એકતાનું મોટું પ્રદર્શન બની રહ્યો હતો. આ કાર્યક્રમમાં કોંગ્રેસના સાંસદ ગેનીબેન ઠાકોર, મંત્રી સ્વરૂપજી ઠાકોર તેમજ ભાજપના ધારાસભ્યો અલ્પેશ ઠાકોર અને કેશાજી ઠાકોર જેવા અગ્રણી નેતાઓ એક જ મંચ પર ઉપસ્થિત રહીને સૌના આકર્ષણનું કેન્દ્ર બન્યા હતા.
આ પ્રસંગે પોતાના વક્તવ્યમાં સાંસદ ગેનીબેન ઠાકોરે સ્પષ્ટ શબ્દોમાં સમાજના આગેવાનોને આંતરિક મતભેદો અને પક્ષીય રાજકારણથી ઉપર ઉઠવા તાકીદ કરી હતી. તેમણે પોતાના અનુભવો ટાંકીને કહ્યું કે ઘણા આગેવાનો અન્યને નીચા દેખાડવા માટે જ કામ કરતા હોય છે અને પક્ષની અંદર રહેલા આવા હિતશત્રુઓથી સમાજે હંમેશાં સાવધ રહેવું જોઈએ. આગામી સમયમાં સમાજની શક્તિને ક્ષીણ થતી અટકાવવા માટે તમામ રાજકીય પક્ષોના ભેદભાવ ભૂલીને માત્ર અને માત્ર સમાહિત માટે એક થવું અનિવાર્ય હોવાનું તેમણે ઉમેર્યું હતું.
બીજી બાજુ, ભાજપના ધારાસભ્ય કેશાજી ચૌહાણે આગામી વર્ષ ૨૦૨૭ની ચૂંટણીને ધ્યાનમાં રાખીને સમાજને અત્યારથી જ સજાગ રહેવા ચેતવણી આપી હતી. તેમણે જણાવ્યું હતું કે ચૂંટણી ટાણે વિવિધ રાજકીય પક્ષો સમાજમાં ભાગલા પાડવાના પેંતરા રચશે, પરંતુ સમાજે પોતાની એકતાની તાકાત કોઈપણ સંજોગોમાં ગુમાવવી જોઈએ નહીં. કેશાજી ચૌહાણના આ સૂરને સમર્થન આપતા ધારાસભ્ય અલ્પેશ ઠાકોરે પણ સ્પષ્ટ કર્યું હતું કે ચૂંટણીઓ તો આવતી-જતી રહેશે, પરંતુ તેના કારણે સમાજની એકતા પર આંચ ન આવવી જોઈએ. સાથે જ તેમણે ખાતરી આપી હતી કે ઠાકોર સમાજના હિતની લડત હંમેશાં લડવાની સાથે અન્ય તમામ વર્ગોને પણ સાથે લઈને આગળ વધીશું.
