સામાન્ય જનતાને મોંઘવારીનો વધુ એક મોટો ફટકો લાગ્યો છે. તાજેતરમાં જ અમૂલ દૂધના ભાવમાં કરાયેલા વધારાની શાહી હજુ સૂકાઈ નથી ત્યાં જ હવે કંપનીએ દહીં અને લસ્સીના ભાવમાં પણ સીધો વધારો ઝીંકી દીધો છે. અગાઉ દિવાળીના તહેવારો દરમિયાન અમૂલ અને મધર ડેરીએ દૂધના ભાવમાં પ્રતિ લિટર બેથી ચાર રૂપિયાનો વધારો કર્યો હતો, જેના કારણે ગ્રાહકો પહેલેથી જ ચિંતિત હતા. હવે દૈનિક વપરાશની અન્ય ડેરી પ્રોડક્ટ્સ પણ મોંઘી થતા મધ્યમ વર્ગ અને ગૃહિણીઓનું આર્થિક આયોજન સંપૂર્ણપણે ખોવાઈ ગયું છે.
ગુજરાત કો-ઓપરેટિવ મિલ્ક માર્કેટિંગ ફેડરેશને (જીસીએમએમએફ) અમૂલ બ્રાન્ડના દૂધની સાથે હવે તેની બનાવટોના પણ ભાવ વધાર્યા છે. નવા ભાવપત્રક અનુસાર, અગાઉ રૂ. 80માં મળતું 1 કિલોગ્રામ દહીં હવે ગ્રાહકોને રૂ. 85માં મળશે, એટલે કે કિલોદીઠ સીધો રૂ. 5નો વધારો થયો છે. આ ઉપરાંત, 380 ગ્રામ દહીંની થેલીનો ભાવ રૂ. 35થી વધારીને રૂ. 37 અને 1 કિલોગ્રામ દહીંની બકેટનો ભાવ રૂ. 115થી વધારીને રૂ. 120 કરી દેવામાં આવ્યો છે. માત્ર દહીં જ નહીં પરંતુ 'અમૂલ રોઝ લસ્સી' પણ મોંઘી થઈ છે, જેમાં રૂ. 2નો વધારો કરીને તેનો નવો ભાવ રૂ. 17 નક્કી કરાયો છે.
આ અગાઉ જીસીએમએમએફ દ્વારા દેશભરમાં વેચાતા તાજા દૂધના મુખ્ય વેરિયન્ટ્સમાં 4થી 5 ટકાનો વધારો લાગુ કરવામાં આવ્યો હતો. જેમાં સૌથી વધુ વેચાતા અમૂલ તાઝા દૂધમાં લિટર દીઠ રૂ. 2 અને અમૂલ ગોલ્ડમાં લિટર દીઠ રૂ. 4નો તોતિંગ વધારો ઝીંકવામાં આવ્યો હતો. આમ, ક્રમશઃ થઈ રહેલા આ ભાવવધારાને કારણે ડેરી પ્રોડક્ટ્સ હવે વધુ ખર્ચાળ સાબિત થઈ રહી છે, જેનાથી સામાન્ય વર્ગના લોકોના ખિસ્સા પર મોટો આર્થિક બોજ પડી રહ્યો છે.
