અમેરિકાની રાજનીતિમાં હાલમાં મોટો વળાંક આવ્યો છે, જ્યાં મધ્યસત્ર ચૂંટણીમાં રિપબ્લિકન પાર્ટીને મળેલી હાર બાદ રાષ્ટ્રપતિ ડોનાલ્ડ ટ્રમ્પે પોતાની રણનીતિ બદલી છે. તેમણે હવે વિરોધી ડેમોક્રેટિક પાર્ટી સામે આક્રમક વલણ અપનાવતા નવો રાજકીય મોરચો ખોલ્યો છે. સોશિયલ મીડિયા પ્લેટફોર્મ 'ટ્રુથ સોશિયલ' પર એક મહત્વપૂર્ણ જાહેરાત કરતા ટ્રમ્પે ઉપપ્રમુખ જેડી વેન્સને ડેમોક્રેટ્સના શાસનવાળા રાજ્યો અને શહેરો પર વિશેષ ધ્યાન કેન્દ્રિત કરવા સૂચના આપી છે. આ રાજ્યોમાં વ્યાપેલા કથિત ભ્રષ્ટાચાર અને વધતી ગુનાખોરી સામે તાત્કાલિક અને કડક પગલાં લેવા માટે વેન્સને જવાબદારી સોંપવામાં આવી છે.
ટ્રમ્પે ખાસ કરીને મિનેસોટા, કેલિફોર્નિયા અને ઇલિનોઇસ જેવા અગ્રણી રાજ્યોના વહીવટી તંત્ર પર સવાલો ઉઠાવતા તેમને ખરાબ વહીવટવાળા અને ભ્રષ્ટાચારથી બરબાદ થયેલા ગણાવ્યા છે. તેમનો દાવો છે કે આ રાજ્યોમાં દર મહિને અબજો ડોલરની ચોરી થઈ રહી છે અને મોટા પાયે ગેરરીતિઓ ચાલી રહી છે. ટ્રમ્પે આક્ષેપ કર્યો છે કે ડેમોક્રેટિક નેતૃત્વના સ્વભાવમાં જ ભ્રષ્ટાચાર સામેલ છે, અને જો આ પ્રકારની ગેરકાયદેસર પ્રવૃત્તિઓ પર અંકુશ લગાવવામાં આવે તો અમેરિકાનું રાષ્ટ્રીય બજેટ ખૂબ જ ઓછા સમયમાં સંતુલિત કરી શકાશે. જોકે, આ ગંભીર આરોપોના સમર્થનમાં હાલમાં કોઈ સત્તાવાર આંકડા કે ચોક્કસ તપાસની વિગતો જાહેર કરવામાં આવી નથી.
આંતરરાષ્ટ્રીય મોરચે પણ ટ્રમ્પે પોતાના વલણમાં સ્પષ્ટતા કરતા જણાવ્યું છે કે હવે ઈરાન સાથે કોઈ પણ પ્રકારના નવા કરાર કે સમજૂતી કરવાની કોઈ જરૂર નથી. તેમણે દાવો કર્યો હતો કે ઈરાન સાથે વાટાઘાટો કરવાનો સમય હવે ઘણો પાછળ છૂટી ગયો છે અને અમેરિકા પાસે હાલમાં ઈરાનના અબજો ડોલર તેમજ હોર્મુઝ સ્ટ્રેટ જેવી મહત્વની મિલકતો ઉપલબ્ધ છે. આ નિવેદન સ્પષ્ટ સંકેત આપે છે કે અમેરિકા આગામી સમયમાં મધ્યપૂર્વની નીતિઓ અને ડેમોક્રેટિક વિરોધીઓ સામે ઘરેલું મોરચે બંને મોખરે વધુ આક્રમક અને સખત રણનીતિ સાથે આગળ વધશે.
