દેશની અગ્રણી ટેલિકોમ કંપની વોડાફોન આઈડિયા (Vi) દ્વારા નાણાકીય વર્ષ ૨૦૨૭ના સપ્ટેમ્બર ક્વાર્ટર (Q2FY27) માટેના નાણાકીય પરિણામો જાહેર કરવામાં આવ્યા છે. ટ્રેઝરી એસેટ્સ પર માર્ક-ટુ-માર્કેટ એડજસ્ટમેન્ટ્સની પ્રતિકૂળ અસર અને કુલ ખર્ચમાં 5.3 ટકાના વધારાને કારણે કંપનીની ચોખ્ખી ખોટ ગયા વર્ષના સમાનગાળાના રૂ. 5,584 કરોડથી વધીને રૂ. 5,975 કરોડ થઈ છે. જોકે, વ્યવસાયિક મોરચે કંપનીએ મજબૂત પ્રદર્શન જાળવી રાખ્યું છે અને ઓપરેશનમાંથી થતી આવક વાર્ષિક ધોરણે 6.2 ટકા વધીને રૂ. 11,884 કરોડ નોંધાઈ છે. કંપનીનું કેશ ઇબિડા (Cash EBITDA) ૧૧.૨ ટકાના વધારા સાથે રૂ. 2,498 કરોડ અને કુલ ઇબિડા 6.3 ટકા વધીને રૂ. 4,981 કરોડ પર પહોંચ્યું છે, જે કંપનીની મજબૂત ઓપરેશનલ સ્થિતિ દર્શાવે છે.
કંપનીના ગ્રાહક આધાર અને નેટવર્ક ક્ષમતામાં મોટો સુધારો જોવા મળ્યો છે, જેમાં સપ્ટેમ્બર ક્વાર્ટરમાં કુલ ગ્રાહક આધાર વધીને 19.44 કરોડ થયો છે. ગ્રાહકો દ્વારા 4G અને 5G સેવા અપગ્રેડ કરવાના કારણે પ્રત્યેક યુઝર દીઠ સરેરાશ આવક (ARPU) 9.7 ટકા વધીને રૂ. 198 થઈ ગઈ છે, જ્યારે દૈનિક ડેટા વપરાશમાં 27.1 ટકાનો મોટો ઉછાળો આવ્યો છે. કંપનીના સીઈઓ અભિજીત કિશોરે જણાવ્યું હતું કે, Vi એ નેટવર્ક વિસ્તરણ માટે અત્યાર સુધીમાં રૂ. 13,200 કરોડથી વધુના કેપેક્સ ઓર્ડર આપ્યા છે, જેમાંથી રૂ. 6,000 કરોડના ઓર્ડર પર અમલ થઈ ચૂક્યો છે. આ ઉપરાંત, કંપનીએ 4G કવરેજને 88 ટકા સુધી પહોંચાડીને છેલ્લા નવ ત્રિમાસિક ગાળામાં સૌથી વધુ પોસ્ટપેડ ગ્રાહકો જોડવાનો રેકોર્ડ બનાવ્યો છે.
નાણાકીય સ્થિરતા અને ભવિષ્યની યોજનાઓ અંગે વાત કરીએ તો, વોડાફોન આઈડિયાએ નાણાકીય વર્ષ ૨૦૨૭ના પ્રથમાર્ધ સુધીમાં રૂ. 10,500 કરોડથી વધુનું કુલ ફંડિંગ સુરક્ષિત કરી લીધું છે, જેમાં ક્વાર્ટર દરમિયાન મેળવેલા રૂ. 4,000 કરોડના વધારાના બેંક ભંડોળનો પણ સમાવેશ થાય છે. કંપનીનું બેંક દેવું ઘટીને માત્ર રૂ. 943 કરોડ રહ્યું છે જ્યારે હાથ પર રોકડ અને બેંક બેલેન્સ રૂ. 5,470 કરોડ છે. તાજેતરમાં પ્રખ્યાત અભિનેતા શાહરૂખ ખાન સાથે 'Vi પે સબ હૈં VIP' કેમ્પેઈન દ્વારા બ્રાન્ડ આઈડેન્ટિટીને નવો ઓપ આપનાર આ ટેલિકોમ દિગ્ગજે હિન્દાલ્કો સાથે ખાનગી નેટવર્ક માટે ભાગીદારી પણ કરી છે. બોમ્બે સ્ટોક એક્સચેન્જ (BSE) પર કંપનીના શેર પરિણામો જાહેર થયા અગાઉ રૂ. 12.98 પર બંધ રહ્યા હતા.
