મ્યુઝિક ઈન્ડસ્ટ્રીના દિગ્ગજ કમ્પોઝર અનિરુદ્ધ રવિચંદર અને આઈપીએલની લોકપ્રિય ટીમ સનરાઇઝર્સ હૈદરાબાદ (SRH)ના સહ-માલિક કાવ્યા મારને પોતાના જીવનની એક નવી અને સુંદર ઇનિંગ્સની શરૂઆત કરી દીધી છે. આ બંનેએ લગ્નના પવિત્ર બંધનમાં બંધાઈને સાત ફેરા લીધા છે, જેનાથી ક્રિકેટ અને મનોરંજન જગતમાં ભારે ખુશીનો માહોલ છે. સોશિયલ મીડિયા પર સામે આવેલી આ નવપરિણીત જોડીની પહેલી તસવીર ઇન્ટરનેટ પર આગની જેમ વાયરલ થઈ રહી છે, જેને જોઈને ફેન્સમાં ભારે ઉત્સાહ અને આશ્ચર્ય જોવા મળી રહ્યો છે. શેર કરવામાં આવેલી આ તસવીરમાં બંને ખૂબ જ રોયલ અને ક્લાસિક અંદાજમાં નજરે પડી રહ્યા છે, જે તેમની જોડીની ભવ્યતા બયા કરે છે.
સામે આવેલી આ સુંદર તસવીરમાં અનિરુદ્ધ અને કાવ્યા એકબીજાનો હાથ પકડીને રંગબેરંગી ફૂલોની વર્ષા વચ્ચે મંડપમાં ચાલતા નજરે પડે છે, જ્યારે પાછળ સફેદ અને પીળા ફૂલોથી કરાયેલી રોયલ સજાવટ આ ક્ષણને વધુ યાદગાર બનાવે છે. પોતાના ખાસ દિવસ માટે અનિરુદ્ધે ક્લાસિક અને ટ્રેડિશનલ લુક અપનાવતા આઇવરી કલરનો કુર્તો, મેચિંગ વેષ્ટી અને ગોલ્ડ ડિટેઇલિંગવાળું લોંગ જેકેટ પહેર્યું હતું. બીજી તરફ, કાવ્યા મારને બ્લશ-પિંક કલરનો અત્યંત આકર્ષક લહેંગો પહેર્યો હતો, જેમાં બારીક એમ્બ્રોઇડરી અને સિક્વિન વર્ક જોવા મળ્યું હતું. આ લહેંગા સાથે તેણે સ્ટેટમેન્ટ ચોકર નેકલેસ, ભારે ઇયરરિંગ્સ અને ખુલ્લા વેવી વાળની હેરસ્ટાઇલ રાખીને પોતાનો બ્રાઇડલ લુક પૂર્ણ કર્યો હતો, જેમાં તે કોઈ પરી જેવી સુંદર લાગતી હતી.
આ રોમેન્ટિક તસવીર સાથે 'My once in a lifetime, for a lifetime' કેપ્શન અને ૧૧.૧૧નો સમય લખવામાં આવ્યો છે, જે તેમના જીવનના આ અદ્ભુત સંયોગને દર્શાવે છે. અનિરુદ્ધ પોતાના સંગીતથી લાખો લોકોના દિલ પર રાજ કરે છે, તો કાવ્યા સ્ટેડિયમમાં પોતાની ટીમ માટેના ઉત્સાહને કારણે જાણીતી છે, જેથી આ લગ્ન ક્રિકેટ અને સિનેમા જગતનો એક અનોખો સંગમ સાબિત થયા છે. આ નવદંપતીને સોશિયલ મીડિયા પર સેલેબ્સ અને ફેન્સ તરફથી શુભેચ્છાઓનો ધોધ વરસી રહ્યો છે અને હવે સૌકોઈ આ સુંદર જોડીના લગ્નની અન્ય તસવીરો જોવા માટે આતુરતાથી રાહ જોઈ રહ્યા છે.
