મધ્ય પૂર્વમાં ફાટી નીકળેલા તણાવ વચ્ચે હોર્મુઝની જળડમરૂમધ્યમાં વધુ એક ગંભીર સુરક્ષા ઘટના સામે આવી છે. ઈરાની સૈન્યના સત્તાવાર નિવેદન અનુસાર, બુધવારે સવારે એક ઓઈલ ટેન્કર નૌકાદળની માઈન (દરિયાઈ સુરંગ) સાથે અથડાતા તેમાં આગ લાગી ગઈ હતી. આ ઘટના હોર્મુઝની ખાડીના પૂર્વ ભાગમાં આવેલા એક અસુરક્ષિત અને પ્રતિબંધિત વિસ્તારમાં બની હતી. ફેબ્રુઆરીના અંતથી શરૂ થયેલા યુદ્ધને પગલે તેહરાને આ વ્યૂહાત્મક જળમાર્ગ પરથી થતી અવરજવર પર ભારે પ્રતિબંધો મૂકી દીધા છે અને માત્ર ઈસ્લામિક રિપબ્લિક દ્વારા અધિકૃત માર્ગોનો જ ઉપયોગ કરવાનો આગ્રહ રાખવામાં આવી રહ્યો છે.
આ સંવેદનશીલ પરિસ્થિતિને પહોંચી વળવા માટે યુનાઇટેડ સ્ટેટ્સે ઈરાની બંદરો પર નૌકાદળની નાકાબंदी કરી દીધી છે અને ટેન્કરોને સુરક્ષિત રીતે પસાર કરવામાં મદદ કરી રહી છે. ઉલ્લેખનીય છે કે વૈશ્વિક સ્તરે વપરાતા કુલ તેલનો લગભગ પાંચમો ભાગ આ મહત્વપૂર્ણ જળમાર્ગમાંથી પસાર થાય છે. તાજેતરમાં જ અમેરિકી લશ્કરે દાવો કર્યો હતો કે ખાડીમાંથી તમામ દરિયાઈ સુરંગો સાફ કરી દેવામાં આવી છે, પરંતુ તાજેતરની આ દુર્ઘટનાએ ફરી એકવાર સુરક્ષા સામે મોટા પ્રશ્નાર્થ ચિન્હો ખડા કર્યા છે. ઈરાની નૌકાદળના દાવા મુજબ પ્રતિબંધિત ક્ષેત્રના નિયમો તોડનારા જહાજો સતત નિશાન બની રહ્યા છે.
છેલ્લા કેટલાક સપ્તાહોથી હોર્મુઝની ખાડીમાં જહાજોમાં આગ લાગવાની અને દરિયાઈ સુરંગો સાથે અથડાવાની ઘટનાઓમાં સતત વધારો જોવા મળ્યો છે. મંગળવારે જ ઈરાનની મિલિટરીની વૈચારિક પાંખ ગણાતી ઇસ્લામિક રેવોલ્યુશનરી ગાર્ડ કોર્પ્સે અન્ય ત્રણ ઓઈલ ટેન્કરોમાં પણ આગ લાગ્યાની પુષ્ટિ કરી હતી. આ ક્ષેત્રમાં યુએસ સેન્ટ્રલ કમાન્ડ દ્વારા જહાજોને એસ્કોર્ટ કરવામાં આવી રહ્યા છે અને ગલ્ફ દેશોને તેલની નિકાસમાં મદદરૂપ થવા માટે વિશેષ પગલાં લેવાઈ રહ્યા છે, તેમ છતાં વૈશ્વિક ઉર્જા પુરવઠાની સુરક્ષા અંગે ચિંતાઓ ચરમસીમાએ પહોંચી ગઈ છે.
