નવી દિલ્હી ખાતે બુધવારની સવારે એક ચિંતાજનક ઘટના સામે આવી છે, જેમાં દેશના પૂર્વ ઉપરાષ્ટ્રપતિ જગદીપ ધનખડ મોર્નિંગ વોક કરી રહ્યા હતા તે દરમિયાન અચાનક ચક્કર આવવાથી ઢળી પડ્યા હતા અને બેભાન થઈ ગયા હતા. તેમની સાથે રહેલા સુરક્ષાકર્મીઓ દ્વારા તુરંત જ તેમને પીસીઆર વાહનમાં ઘરે લઈ જવામાં આવ્યા હતા. ત્યારબાદ આઈએલબીએસ (ILBS) ની મેડિકલ ટીમ અને એઈમ્સના ડોક્ટર સંદીપ સેથ દ્વારા તેમની પ્રાથમિક તપાસ કરવામાં આવી હતી. જોકે, તેમની તબિયતની ગંભીરતાને ધ્યાનમાં રાખીને તેમને તાત્કાલિક એમ્બ્યુલન્સ દ્વારા દિલ્હીની જાણીતી ઓલ ઈન્ડિયા ઈન્સ્ટિટ્યુટ ઓફ મેડિકલ સાયન્સિસ (AIIMS) માં ખસેડવામાં આવ્યા હતા.
અત્રે ઉલ્લેખનીય છે કે ૭૫ વર્ષીય જગદીપ ધનખડ ઓગસ્ટ ૨૦૨૨થી લઈને ૨૧ જુલાઈ ૨૦૨૫ના રોજ પોતાના રાજીનામા સુધી ભારતના ૧૪મા ઉપરાષ્ટ્રપતિ પદ પર રહ્યા હતા. છેલ્લા બે વર્ષ દરમિયાન તેમની તબિયત અંગે અગાઉ પણ કેટલાક કસાણો સામે આવ્યા છે, જેમાં અગાઉ પણ તેઓ બેભાન થવાની અનેક ઘટનાઓનો સામનો કરી ચૂક્યા છે. ગત માર્ચ ૨૦૨૫માં છાતીમાં દુખાવાની ફરિયાદ બાદ તેમને એઈમ્સના ક્રિટિકલ કેર યુનિટમાં દાખલ કરવામાં આવ્યા હતા જ્યાં તેમની એન્જિયોપ્લાસ્ટી કરવામાં આવી હતી. આ ઉપરાંત, જૂન ૨૦૨૫માં નૈનિતાલની મુલાકાત દરમિયાન કુમાઉ યુનિવર્સિટીના કાર્યક્રમમાં પણ તેઓ મંચ પર બેભાન થઈ ગયા હતા તેમજ જાન્યુઆરીમાં પણ ઘરે બે વખત તેઓ બેભાન થયા હોવાના અહેવાલો હતા.
વર્તમાન સમયમાં એઈમ્સ હોસ્પિટલના કાર્ડિયોલોજી વિભાગના તબીબો દ્વારા તેમની હેલ્થ કન્ડિશનનું મૂલ્યાંકન કરવામાં આવી રહ્યું છે અને તેમને હોસ્પિટલના વિશેષ કાર્ડિયો-ન્યુરો સેન્ટરમાં રાખવામાં આવ્યા છે. હોસ્પિટલ પ્રશાસન દ્વારા હજુ સુધી તેમના સ્વાસ્થ્ય અંગે કોઈ અધિકૃત બુલેટિન કે સત્તાવાર નિવેદન બહાર પાડવામાં આવ્યું નથી. પદ છોડ્યા બાદ તેઓ દક્ષિણ દિલ્હીમાં હરિયાણાના રાજકારણી અભય ચૌટાલાના ફાર્મહાઉસ પર રહેતા હોવાનું સૂત્રો જણાવી રહ્યા છે. દેશના પૂર્વ ઉચ્ચ પદાધિકારીની તબિયત અચાનક લથડવાના આ સમાચારથી રાજકીય વર્તુળો અને દેશભરમાં ચિંતાનું મોજું ફરી વળ્યું છે.
