એપ્રિલ ૨૦૨૨માં ગોવિંદાસામી નામના એક પેન્શનરનું માર્ગ અકસ્માતમાં ગંભીર ઈજાઓ થવાથી દુઃખદ અવસાન થયું હતું. તેમના સ્ટેટ બેંક ઓફ ઈન્ડિયા (SBI) ના પેન્શન એકાઉન્ટ સાથે જોડાયેલી ગ્રુપ પર્સનલ એક્સિડન્ટ પોલિસી અંતર્ગત તેમની પત્ની અને બે પુત્રીઓએ ૩૦ લાખ રૂપિયાના આકસ્મિક મૃત્યુ વીમા દાવા માટે અરજી કરી હતી. જો કે, વીમા કંપની ટાટા એઆઈએજ જનરલ ઇન્શ્યોરન્સે પોલિસીની શરતોમાં દારૂના સેવન (alcohol consumption) ના અપવાદને ટાંકીને જાન્યુઆરી ૨૦૨૩માં આ દાવો સંપૂર્ણપણે રદ કરી દીધો હતો. કંપનીના આ મનસ્વી નિર્ણય સામે પરિવારે વેલોરના ડિસ્ટ્રિક્ટ કન્ઝ્યુમર કમિશનમાં ન્યાયની ગુહાર લગાવી હતી, જ્યાં ચુકાદો પરિવારની તરફેણમાં આવ્યો હતો.
ડિસ્ટ્રિક્ટ કમિશનના ચુકાદા સામે ટાટા એઆઈએજ કંપનીએ તમિલનાડુ સ્ટેટ કન્ઝ્યુમર ડિસ્પ્યુટ્સ રિડ્રેસલ કમિશનમાં અપીલ દાખલ કરી હતી. સુનાવણી દરમિયાન રાજ્ય આયોગે વીમા કંપનીની દલીલોમાં ગંભીર પુરાવાકીય ખામીઓ શોધી કાઢી હતી. આયોગે સ્પષ્ટ કર્યું કે હોસ્પિટલના ડેથ સમરી રેકોર્ડમાં માત્ર દારૂના ઇતિહાસનો ઉલ્લેખ કરવો એ સાબિત નથી કરતું કે અકસ્માત સમયે વ્યક્તિ ખરેખર નશાની હાલતમાં હતી. આ ઉપરાંત, કંપની દ્વારા રજૂ કરવામાં આવેલી મેડિકલ ફાઇલો અને લેબોરેટરી રિપોર્ટ્સમાં મૃત્યુની તારીખ સહિતની બાબતોમાં ભારે વિસંગતતાઓ જોવા મળી હતી, જેના કારણે વીમા કંપનીના પુરાવાઓની વિશ્વસનીયતા પર પ્રશ્નાર્થ ચિહ્ન ઊભું થયું હતું.
રાજ્ય આયોગે કાનૂની સ્થિતિ સ્પષ્ટ કરતા જણાવ્યું કે જ્યારે કોઈ વીમા કંપની પોલિસીના એક્ઝલુઝન (અપવાદ) ક્લોઝનો આશરો લઈને દાવો રદ કરે છે, ત્યારે તે સાબિત કરવાની પ્રાથમિક જવાબદારી કંપનીની જ રહે છે. આ કેસમાં વીમા કંપની પૂરતા અને સચોટ પુરાવા રજૂ કરવામાં નિષ્ફળ રહી હતી, જેને સેવામાં ક્ષતિ (deficiency in service) ગણવામાં આવી. પરિણામે, આયોગે વીમા કંપનીની અપીલ ફગાવી દેતા ૩૦ લાખ રૂપિયાનો વીમા દાવો, ૧ સપ્ટેમ્બર ૨૦૨૩થી લાગુ પડતું ૯ ટકા વાર્ષિક વ્યાજ, માનસિક ત્રાસ માટે ૫૦,૦૦૦ રૂપિયા અને કાનૂની ખર્ચ પેટે ૨૫,૦૦ રૂપિયા ચૂકવવાનો આદેશ આપ્યો છે.
