જમ્મુ-કાશ્મીરના ગાંદરબલ જિલ્લામાં સોનમર્ગથી શ્રીનગર તરફ જઈ રહેલા પ્રવાસીઓ માટે એક ખુબ જ ડરામણી ઘટના સામે આવી છે. કંગન વિસ્તારના ગુંડ સુંબલ પાવર હાઉસ નજીક પહોંચતા જ અચાનક એક ટેમ્પો ટ્રાવેલર ચાલક પોતાના વાહન પરથી કાબૂ ગુમાવી બેઠો હતો, જેના પરિણામે આ વાહન અંદાજે 60 ફૂટ જેટલી ઊંડી ખીણમાં ધસી પડ્યું હતું. આ ગંભીર માર્ગ અકસ્માતને પગલે વાહનમાં સવાર ડ્રાઈવર સહિત કુલ 18 મુસાફરો ગંભીર રીતે ઈજાગ્રસ્ત થયા છે. દુર્ઘટનાની ખાસ વાત એ છે કે આ ભોગ બનનારાઓમાં ગુજરાતના આર્થિક પાટનગર અમદાવાદ તેમજ ડાયમંડ સિટી સુરતના કુલ 8 પ્રવાસીઓ પણ સામેલ હોવાનું સત્તાવાર રીતે બહાર આવ્યું છે, જેના કારણે ગુજરાતમાં પણ ચિંતાનું મોજું ફરી વળ્યું છે.
ઘટનાની ગંભીરતાને ધ્યાનમાં રાખીને સ્થાનિક વહીવટી તંત્ર અને પોલીસ વિભાગ દ્વારા ત્વરિત અને પ્રશંસનીય બચાવ કામગીરી હાથ ધરવામાં આવી હતી. આસપાસના સ્થાનિક રહીશો પણ તાત્કાલિક મદદે દોડી આવ્યા હતા. ગનીવન, ગુંડ અને સોનમર્ગના પ્રાથમિક આરોગ્ય કેન્દ્રોમાંથી તાત્કાલિક એમ્બ્યુલન્સ બોલાવીને તમામ ઘાયલોને પ્રથમ ગુંડ પીએચસી ખાતે ખસેડવામાં આવ્યા હતા. અહીં પ્રાથમિક સારવાર આપ્યા બાદ તબીબોની સલાહ મુજબ તમામ 18 ઈજાગ્રસ્તોને વધુ અને વિશેષ સારવાર માટે શ્રીનગરની પ્રતિષ્ઠિત શેર-એ-કશ્મીર ઇન્સ્ટિટ્યૂટ ઓફ મિડિકલ સાયન્સ (SKIMS) હોસ્પિટલમાં રિફર કરવામાં આવ્યા છે. પ્રાથમિક અહેવાલો મુજબ, આ દુર્ઘટનામાં ઘાયલ થયેલા પ્રવાસીઓમાંથી 6 લોકોની પ્રીતિ સ્થિતિ અત્યંત નાજુક અને ગંભીર બતાવાઈ રહી છે.
સબ-ડિવિઝનલ પોલીસ ઓફિસર (SDPO) પાસેથી પ્રાપ્ત વિગતો અનુસાર, આ અકસ્માતનો ભોગ બનેલા પ્રવાસીઓમાં માત્ર ગુજરાત જ નહીં પરંતુ પશ્ચિમ બંગાળના મુર્શિદાબાદ અને પંજાબના ગુરદાસપુરના નાગરિકો પણ સામેલ છે. વળી, જે વાહન અકસ્માતનો ભોગ બન્યું હતું તેને પંજાબના ગુરદાસપુરના રહેવાસી ચલાવી રહ્યા હતા. પોલીસની પ્રાથમિક તપાસમાં પ્રાથમિક અનુમાન લગાવવામાં આવી રહ્યું છે કે વાહનની અતિશય તેજ ગતિના કારણે ડ્રાઈવરે વળાંક પર કે અચાનક સ્ટેરિંગ પરથી કાબૂ ગુમાવ્યો હોવો જોઈએ. હાલ પોલીસ આ સમગ્ર માર્જ અકસ્માત અંગે ઝીણવટભરી તપાસ ચલાવી રહી છે અને પ્રવાસીઓની સુરક્ષાને લઈને ફરી એકવાર ગંભીર સવાલો ઊભા થયા છે.
