ભાવનગર જિલ્લાના પાલીતાણા શહેરમાંથી સોશિયલ મીડિયા પર વાયરલ થયેલી એક ઘટનાએ કાયદો અને વ્યવસ્થા સામે ગંભીર સવાલો ખડા કર્યા છે. સોશિયલ મીડિયા પર સ્ટાર બનવાની ઘેલછામાં યુવાનો કેવી બેજવાબદાર હરકતો પર ઉતરી આવ્યા છે તેનું આ તાજું ઉદાહરણ છે. વાયરલ થયેલા વીડિયોમાં એક યુવકે ધોળા દિવસે શહેરના મુખ્ય જાહેર માર્ગ પર વચ્ચે જ ખુરશી ગોઠવી દીધી હતી અને તેના પર બેસીને બેફામ હરકતો કરી હતી. આ પ્રકારની અસંવેદનશીલ સ્ટંટબાજીના કારણે રસ્તા પર અચાનક ભારે ટ્રાફિકજામ સર્જાયો હતો, જેના કારણે સામાન્ય રાહદારીઓ અને વાહનચાલકોને ભારે હાલાકીનો સામનો કરવો પડ્યો હતો. આ સમગ્ર ઘટનાને લઈને સ્થાનિક નાગરિકોમાં ભારે રોષ પ્રવર્તી રહ્યો છે.
આ વિવાદાસ્પદ વીડિયોમાં હદ તો ત્યારે વટાઈ ગઈ જ્યારે યુવકે પ્રખ્યાત મૂવીના 'ખલનાયક' ગીતની ધૂન પર ડાન્સ કરવાની સાથે સામેથી આવી રહેલી એક ચાલુ કારની સામે અચાનક ખુરશી ફેંકીને જીવલેણ સ્ટંટ કરવાનો પ્રયાસ કર્યો હતો. આ પ્રકારના જોખમી કારનામા માત્ર રીલ બનાવવા પૂરતા સીમિત નથી, પરંતુ તે ખુદ યુવક તેમજ રસ્તા પરથી પસાર થઈ રહેલા અન્ય નિર્દોષ નાગરિકોના જાનમાલ માટે પણ મોટું જોખમ ઊભું કરે છે. ચર્ચાસ્પદ બાબત એ છે કે અગાઉ પણ આ જ શખ્સના આવા અનેક જોખમી વીડિયો સોશિયલ મીડિયા પર વાયરલ થઈ ચૂક્યા છે, જે દર્શાવે છે કે તેને કાયદાનો કોઈ ડર નથી.
જાહેર રસ્તાઓ પર આ પ્રકારે ખુલ્લેઆમ કાયદો હાથમાં લઈને પોલીસ તંત્રને પડકાર ફેંકવાની આ ઘટનાએ પાલીતાણા પોલીસની કામગીરી અને પેટ્રોલિંગ સામે પણ ગંભીર સવાલો ઊભા કર્યા છે. શહેરમાં કાયદો અને વ્યવસ્થા જાળવવાની જવાબદારી ધરાવતા તંત્રની નાક નીચે આ પ્રકારની પ્રવૃત્તિઓ થવી તે ચિંતાજનક છે. જો કે, આ મામલો સોશિયલ મીડિયાના માધ્યમથી ઉચ્ચ અધિકારીઓ અને પાલીતાણા પોલીસ સ્ટેશનના સાયબર ક્રાઇમ સેલ સુધી પહોંચતા જ તંત્ર સફાળું જાગ્યું છે. પોલીસે વીડિયોની સત્યતા ચકાસીને આ બેજવાબદાર યુવક વિરુદ્ધ કાયદેસરની કડક કાર્યવાહીના ચક્રો ગતિમાન કર્યા છે.
