જામનગર-કાલાવડ હાઈવે પર આવેલા અલીયાબાડા ગામના પાટિયા નજીક એક હૃદયદ્રાવક અકસ્માત સર્જાયો હતો, જેમાં જાડેજા પરિવારની ખુશીઓ ક્ષણભરમાં માતમમાં ફેરવાઈ ગઈ હતી. એક જ પરિવારના આઠ સભ્યોને લઈને પૂરપાટ ઝડપે જઈ રહેલી ઈકો કારનું અચાનક ચાલુ સફરે ટાયર ફાટી ગયું હતું. ટાયર ફાટવાના કારણે ચાલકનો વાહન પરનો કાબૂ છૂટી ગયો હતો અને કાર ધડાકાભેર માર્ગ પરના પુલ સાથે અથડાઈને ફંગોળાઈને પલટી ખાઈ ગઈ હતી. નવા વર્ષના પર્વ પર જ ઘટેલી આ કરુણ દુર્ઘટનાને કારણે સમગ્ર પરિવાર અને આસપાસના વિસ્તારમાં ભારે શોક અને સન્નાટો છવાઈ ગયો હતો.
આ ભયાનક અકસ્માતનું સ્વરૂપ એટલું ગંભીર હતું કે કારમાં સવાર બે મહિલા સભ્યો 17 વર્ષીય માનસીબા જાડેજા અને કૈલાશબા જાડેજાને શરીરે ગંભીર ઈજાઓ પહોંચતા તેમણે ઘટનાસ્થળે જ દમ તોડી દીધો હતો. આ ઉપરાંત, કારમાં મુસાફરી કરી રહેલા અન્ય છ મુસાફરો જેમાં પ્રિયંકાબા જાડેજા, રંજનબા જાડેજા તેમજ માત્ર ૩ વર્ષના મણિયાતાબા અને ૭ વર્ષના સ્વંદીપસિંહ જેવા માસૂમ બાળકો પણ સામેલ હતા, તેઓ ઘાયલ થયા હતા. અકસ્માતનો ભયાનક અવાજ સાંભળીને હાઈવે પરથી પસાર થતા રાહદારીઓ અને સ્થાનિક લોકો તાત્કાલિક મદદે દોડી આવ્યા હતા અને રાહત તથા બચાવ કામગીરી હાથ ધરી હતી.
બનાવની જાણ થતાં જ 108 એમ્બ્યુલન્સ સેવાના કર્મચારીઓ ત્વરિત ઘટનાસ્થળે પહોંચી ગયા હતા અને તમામ ઈજાગ્રસ્તોને તાત્કાલિક ધોરણે સારવાર માટે જામનગરની સરકારી જી.જી. હોસ્પિટલ ખાતે ખસેડ્યા હતા, જ્યાં હાલ તેમની તબીબી સારવાર ચાલી રહી છે. બીજી તરફ, ઘટનાની ગંભીરતાને ધ્યાનમાં રાખીને પંચકોશી 'એ' ડિવિઝન પોલીસ સ્ટેશનનો કાફલો પણ તાત્કાલિક ઘટનાસ્થળે દોડી ગયો હતો. પોલીસે મૃતકોના નશ્વર દેહોને પોસ્ટમોર્ટમ અર્થે મોકલી આપીને અકસ્માતનો ગુનો નોંધી દીધો છે અને કારનું ટાયર ફાટવા પાછળના ચોક્કસ કારણો સહિતની બાબતોની ઊંડાણપૂર્વક કાનૂની તપાસ શરૂ કરી છે.
