ટેકનોલોજી જગતની દિગ્ગજ કંપની એનવીડિયાના મુખ્ય કાર્યકારી અધિકારી (સીઈઓ) જેેન્સન હુઆંગ હાલમાં એક મોટા વિવાદના ભંવરમાં ફસાયા છે. સિંગાપોરની ડેટા સેન્ટર કંપનીના પૂર્વ એક્ઝિક્યુટિવ એલિસ હુઆંગ સાથેના કથિત સંબંધો અને ચીની ગુપ્તચર એજન્સીઓ સાથે તેમના જોડાણની આશંકાઓને કારણે રાજકીય અને સુરક્ષા વર્તુળોમાં હલચલ મચી ગઈ છે. આ મામલે અમેરિકી સંસદના ડેમોક્રેટિક અને રિપબ્લિકન બંને પક્ષના નેતાઓ દ્વારા સેમિકન્ડક્ટરની નિકાસ બાબતે કડક તપાસની માંગ કરવામાં આવી રહી છે. આ ગંભીર આરોપો વચ્ચે રાષ્ટ્રપતિ ડોનાલ્ડ ટ્રમ્પે જેેન્સન હુઆંગનો બચાવ કરતા જણાવ્યું હતું કે તેમણે અંગત વાતચીતમાં હુઆંગ પર વિશ્વાસ વ્યક્ત કર્યો છે અને તેમને આ કથિત જાસૂસી નેટવર્ક વિશે કોઈ જાણકારી ન હતી. ટ્રમ્પે હુઆંગને ઉચ્ચ ગુણવત્તાવાળા વ્યક્તિ ગણાવ્યા છે અને એફબીઆઈની તપાસમાં તેઓ નિર્દોષ સાબિત થશે તેમ જણાવ્યું છે.
આ વિવાદ માત્ર વ્યક્તિગત સંબંધો પૂરતો મર્યાદિત નથી, પરંતુ તેના પર પણ સવાલો ઉઠ્યા છે કે શું અબજો ડોલરના અત્યાધુનિક એનવીડિયા પ્રોસેસર્સ મધ્યસ્થીઓ દ્વારા અમેરિકી પ્રતિબંધોને નેવે મૂકીને ચીની કંપનીઓને પહોંચાડવામાં આવ્યા હતા કે નહીં. રોઇટર્સના અહેવાલ મુજબ, એલિસ હુઆંગ અને તેમની સાથે સંકળાયેલા નેટવર્કે આશરે ૭.૫ અબજ ડોલરની કિંમતના ૨,૪૦,૦૦૦ જેટલા અદ્યતન પ્રોસેસર્સ (જેવા કે H100, H200 અને A100) ચીનને મોકલવામાં મદદ કરી હોવાના આક્ષેપો છે. આ પરિસ્થિતિને કારણે વોશિંગ્ટનમાં રાષ્ટ્રીય સુરક્ષા અને વ્યાપારિક હિતો વચ્ચે સંતુલન જાળવવાને લઈને ભારે રાજકીય દબાણ ઊભું થયું છે. બીજી બાજુ, ચીનના વિદેશ મંત્રાલયે આ તમામ આક્ષેપોને પાયાવહીન ગણાવીને ફગાવી દીધા છે, જ્યારે ચીન સાથેના વ્યાપારિક અવસરોને જાળવી રાખવા માટે હુઆંગ અગાઉ પણ પ્રયાસ કરતા રહ્યા છે.
આ ગંભીર આરોપો અને વિવાદો વચ્ચે એનવીડિયાના બોર્ડ ઓફ ડિરેક્ટર્સે આંતરિક અને સ્વતંત્ર તપાસ શરૂ કરી છે જેથી એ જાણી શકાય કે તેમના સીઈઓ કોઈ વિદેશી ગુપ્તચર ઓપરેશનનો ભોગ બન્યા છે કે કેમ. કંપનીએ સ્પષ્ટ કર્યું છે કે અત્યાર સુધીની પ્રાથમિક તપાસમાં રાષ્ટ્રીય સુરક્ષા કે કંપનીના રહસ્યો સાથે કોઈ ચેડા થયા હોવાના પુરાવા મળ્યા નથી, છતાં બોર્ડ તમામ પાસાઓની ઊંડાણપૂર્વક તપાસ કરશે. આ સાથે જ જેેન્સન હુઆંગે પોતાના અંગત જીવન અંગેની ભૂલ સ્વીકારીને પરિવાર અને શેરહોલ્ડરો સમક્ષ જાહેરમાં માફી માંગી છે. આ સમગ્ર ઘટનાક્રમની સીધી અસર કંપનીના શેરો પર જોવા મળી છે અને સેન જોસેની ફેડરલ કોર્ટમાં રોકાણકારો દ્વારા ક્લાસ-એક્શન મુકદ્દમો પણ દાખલ કરવામાં આવ્યો છે, જે આગામી સમયમાં વિશ્વની આ અગ્રણી AI ચિપમેકર કંપની માટે મોટા પડકારો સર્જી શકે છે.
