દિવાળીના પવિત્ર તહેવાર અને વિક્રમ સંવત નવા વર્ષના પ્રારંભ નિમિત્તે દેશના મુખ્ય શેરબજારો એટલે કે નેશનલ સ્ટોક એક્સચેન્જ (એનએસઇ) અને બોમ્બે સ્ટોક એક્સચેન્જ (બીએસઇ) મંગળવાર, ૧૦ નવેમ્બરના રોજ સંપૂર્ણપણે બંધ રહેશે. રવિવારના વિશેષ મુહૂર્ત ટ્રેડિંગ અને સોમવારના નિયમિત સત્ર બાદ આજા બજારમાં ઇક્વિટી, ડેરિવેટિવ્ઝ, કેપિટલ માર્કેટ, ડેટ માર્કેટ અને ઇલેક્ટ્રોનિક ગોલ્ડ રિસિપ્ટ્સ સહિતના તમામ સેગમેન્ટ્સમાં વેપાર સ્થગિત રહેશે. જો કે, રોકાણકારો અને વેપારીઓ માટે રાહતની વાત એ છે કે આગામી બુધવાર, ૧૧ નવેમ્બરથી શેરબજારમાં નિયમિત ટ્રેડિંગ ફરીથી શરૂ થઈ જશે, જ્યારે નવેમ્બર મહિનામાં આગામી રજા ૨૪ તારીખે ગુરુ નાનક જયંતિ નિમિત્તે રહેશે.
શેરબજારની સાથે-સાથે રિઝર્વ બેંક ઓફ ઇન્ડિયા (આરબીઆઈ)ના ક્ષેત્રીય રજાઓના કેલેન્ડર મુજબ દેશના કેટલાક પસંદગીના શહેરોમાં બેંક શાખાઓ પણ બંધ રહેવાની છે. અમદાવાદ, મુંબઈ, બેંગલુરુ, નાગપુર, દેહરાદૂન અને ગંગટોક સહિતના શહેરોમાં દિવાળી, બલિપ્રતિપદા અને ગોવર્ધન પૂજાના કારણે બેંકોમાં રજા રહેશે. આ રાષ્ટ્રીય સ્તરની રજા ન હોવાથી અન્ય શહેરોમાં બેંકો રાબેતા મુજબ ચાલુ રહેશે. બેંક ગ્રાહકોએ મુલાકાત લેતા પહેલા પોતાની સ્થાનિક બ્રાન્ચની સ્થિતિ ચકાસી લેવી જરૂરી છે, કારણ કે ૧૧ નવેમ્બરે પણ લખનૌ, કોલકાતા અને શિમલા જેવા શહેરોમાં ભાઈબીજ અને લક્ષ્મી પૂજાને કારણે બેંકો બંધ રહેવાની છે.
બેંક શાખાઓ ભલે બંધ રહે, પરંતુ ગ્રાહકોની સુવિધા માટે ડિજિટલ બેંકિંગ સેવાઓ રાબેતા મુજબ ધમધમતી રહેશે. ગ્રાહકો યુપીઆઈ એપ્લિકેશન્સ, ઇન્ટરનેટ અને મોબાઇલ બેંકિંગ તેમજ એનઈએફટી અને આરટીજીએસ દ્વારા નાણાકીય લેણદેણ કરી શકશે. આ ઉપરાંત, રોકડ ઉપાડ માટે એટીએમ પણ ઉપલબ્ધ રહેશે. જો કે, ભૌતિક રીતે શાખામાં જઈને કરવા પડતા કામો જેવા કે નાણાકીય ડિપોઝિટ, કાઉન્ટર પરથી રોકડ ઉપાડવી, દસ્તાવેજ જમા કરાવવા કે લોકર સુવિધા જેવી સેવાઓ મંગળવારે ઉપલબ્ધ રહેશે નહીં જે બુધવારથી ફરી શરૂ થઈ જશે.
