વ્હાઇટ હાઉસમાં કતારના વડાપ્રધાન શેખ મોહમ્મદ બિન અબ્દુલરમાન બિન જાસિમ અલ થાની સાથેની બેઠક બાદ પત્રકારો સાથે વાતચીતમાં અમેરિકી રાષ્ટ્રપતિ ડોનાલ્ડ ટ્રમ્પે સ્પષ્ટ કર્યું હતું કે ઈરાન સાથેનો સંઘર્ષ હાલ પૂરતો સૈન્ય સ્તરે સમાપ્ત થઈ ગયો છે અને વર્તમાન સ્થિતિ જાળવી રાખવામાં આવી રહી છે. ટ્રમ્પે જણાવ્યું હતું કે ઈરાનનું નેતૃત્વ નબળું પડ્યું છે અને વોશિંગ્ટન તથા તેહરાન વચ્ચે પરમાણુ કાર્યક્રમને નાથવા માટેની લાંબા ગાળાની સમજૂતી માટેની વાטઘાટોમાં હકારાત્મક વલણ જોવા મળી રહ્યું છે. જોકે, તેમણે એમ પણ ઉમેર્યું હતું કે અમેરિકી દળો કોઈપણ પરિસ્થિતિનો સામનો કરવા માટે સંપૂર્ણપણે સજ્જ અને તૈયાર છે, જેથી જરૂર પડ્યે ફરીથી સૈન્ય કાર્યવાહી શરૂ કરી શકાય.
બીજી બાજુ, ઈરાન તરફથી આક્રમક રૂખ જાળવી રાખવામાં આવ્યો છે અને પરમાણુ વાટાઘાટોમાં પ્રવેશતા પહેલા અનેક શરતો લાદવામાં આવી છે. ઈરાની સુરક્ષા પરિષદના વડા મોહસિન રેઝાઈએ વાટાઘાટોના અહેવાલોને ફગાવી દેતા જણાવ્યું છે કે યુદ્ધે અમેરિકી સરકારને હચમચાવી દીધી છે અને હવે સમય આવી ગયો છે કે અમેરિકા ઈરાનની સાત શરતો સામે શરણાગતિ સ્વીકારે. ઈરાન દ્વારા મુખ્યત્વે તેના દરિયાકાંઠે નાખવામાં આવેલી નાકાબંધી હટાવવા, તમામ પ્રતિબંધો પાછા ખેંચવા, જપ્ત કરાયેલી સંપત્તિ મુક્ત કરવા અને લેબનોન સહિતના ક્ષેત્રમાં ઇઝરાયેલની સૈન્ય કાર્યવાહી બંધ કરવા જેવી માંગણીઓ કરવામાં આવી રહી છે.
અમેરિકાએ કતાર અને અન્ય ખાડી દેશોના સહયોગથી રાજદ્વારી પ્રયાસો તો ચાલુ રાખ્યા છે, પરંતુ હજુ સુધી ઈરાન કિનારે તૈનાત પોતાના હજારો સૈનિકો અને નૌકાદળની નાકાબંધી પાછી ખેંચવાનો કોઈ ઈશારો કર્યો નથી. દરમિયાન, અમેરિકી સંરક્ષણ મંત્રી પીટ હેગસેથની યુદ્ધ અંગેની નીતિ અને કોંગ્રેસની મંજૂરી વગર કાર્યવાહી કરવાને કારણે સ્થાનિક રાજકારણમાં પણ વિવાદ સર્જાયો છે, જ્યાં રિપબ્લિકન પ્રતિનિધિઓ દ્વારા તેમની સામે મહાભિયોગ લાવવાના પ્રયાસો પણ શરૂ થયા છે. આ અનિશ્ચિતતા અને સુરક્ષા જોખમોને ધ્યાનમાં રાખીને અમેરિકી વિદેશ વિભાગ દ્વારા ઈરાન, ઇરાક, લેબનોન, લિબિયા, સીરિયા અને યમન જેવા દેશો માટે અત્યંત કડક ટ્રાવેલ એડવાઈઝરી જારી કરીને નાગરિકોને આ પ્રદેશોની મુસાફરી ન કરવાની સલાહ આપવામાં આવી છે.
