બ્રિટિશ અભિનેતા અને કોમેડિયન રસેલ બ્રાન્ડને બે દાયકા પહેલાં એક મહિલા પર બળાત્કાર અને અન્ય ત્રણ મહિલાઓ પર યૌન ઉત્પીડન કરવાના ગંભીર ગુનામાં કોર્ટે સાડા દસ વર્ષની જેલની સજા ફટકારી છે. જજ જોએલ બેનાથાને સુનાવણી દરમિયાન બ્રાન્ડની માનસિકતા પર સવાલ ઉઠાવતા જણાવ્યું હતું કે મહિલાઓની ના મરજી સામે તેને ક્યારેય કોઈ પરવાહ નહોતી અને તેનું વર્તન અત્યંત અહંકારી તથા બેદરકાર હતું. આ કેસ સામે આવ્યા બાદથી સમગ્ર હોલીવુડ જગતમાં હલચલ મચી ગઈ છે અને પીડિતોને ન્યાય મળવાની આશા બંધાઈ છે, જોકે બ્રાન્ડ દ્વારા પોતાની નિર્દોષતાનો દાવો કરવામાં આવ્યો હતો અને તમામ સંબંધો પરસ્પર સહમતિથી થયા હોવાનું રટણ કરવામાં આવ્યું હતું.
આ ચુકાદા બાદ પૉપ સંગીત જગતની દિગ્ગજ ગાયિકા અને રસેલ બ્રાન્ડની ભૂતપૂર્વ પત્ની કેટી પેરી ફરી એકવાર ચર્ચાના કેન્દ્રમાં આવી ગઈ છે. મીડિયા રિપોર્ટ્સ અનુસાર, પેરી હવે પોતાના ભૂતકાળ અને આ ચોંકાવનારી ઘટનાઓ વિશે ખુલીને બોલવા માટે એક આત્મકથાત્મક પુસ્તક અથવા તો ડોક્યુમેન્ટરી સિરીઝ બનાવવાની તૈયારી કરી રહી છે. અગાઉ જ્યારે બ્રાન્ડ સામે કાનૂની કાર્યવાહી ચાલી રહી હતી ત્યારે પેરીએ ચૂપ રહેવાનું પસંદ કર્યું હતું, પરંતુ હવે ટ્રાયલ પૂર્ણ થતાં તે પોતાના ૧૪ મહિનાના લગ્નજીવન દરમિયાન સહન કરેલી મુશ્કેલીઓ દુનિયા સામે લાવવા માટે સંપૂર્ણપણે તૈયાર હોવાનું મનાઈ રહ્યું છે.
કેટી પેરી અને રસેલ બ્રાન્ડ વચ્ચેનો સંબંધ વર્ષ ૨૦૦૯માં શરૂ થયો હતો અને તેમણે ૨૦૧૦માં લગ્ન કર્યા હતા, પરંતુ આ સંબંધ માંડ ૧૪ મહિના જ ટક્યો હતો અને ડિસેમ્બર ૨૦૧૧માં તેમના છૂટાછેડાની જાહેરાત થઈ હતી. અગાઉ આપેલા નિવેદનોમાં પેરીએ સ્વીકાર્યું હતું કે શરૂઆતમાં બ્રાન્ડ સમાન ભાગીદારીની વાત કરતો હતો, પરંતુ તેની પોતાની સફળતાથી બ્રાન્ડ અસલામતી અનુભવતો હતો અને નિયંત્રણ રાખવાનો પ્રયાસ કરતો હતો. આ નવો ઘટસ્ફોટ માત્ર એક સેલિબ્રિટી કપલના અંગત જીવનના વિખવાદ પૂરતો સીમિત નથી, પરંતુ મનોરંજન જગતમાં મહિલાઓની સુરક્ષા અને શોષણના મુદ્દાઓને વધુ પ્રબળતાથી ઉજાગર કરી રહ્યો છે.
