જામનગરમાં છેલ્લા દોઢ દાયકાથી વિવિધ વિષયો પર રિયાલિસ્ટિક રંગોળીના સર્જન માટે જાણીતા આર્ટિસ્ટ રિદ્ધિ શેઠે વધુ એક વખત પોતાની કલાના માધ્યમથી સમાજને એક સચોટ અને સમયোপયોગી સંદેશ આપ્યો છે. ITRA જામનગરનાં ડાયરેક્ટર પ્રો. ડૉ. તનુજા નેસરીના હસ્તે અનાવરણ પામેલી આ 6x4 ફૂટની કલાકૃતિ ‘બિયોન્ડ ધ સ્ક્રીન’ (Beyond the Screen) નામથી પ્રદર્શિત કરવામાં આવી છે. આ રંગોળીમાં સ્માર્ટફોનની ફ્રેમની અંદર બારી પાસે બેસીને પુસ્તક વાંચતો એક બાળક દર્શાવવામાં આવ્યો છે, જેમાં ખુલ્લું પુસ્તક મોબાઇલ સ્ક્રીનની બહાર 3D સ્વરૂપે અદ્ભુત રીતે ઊભરતું દેખાય છે. પૂર્વ રાષ્ટ્રપતિ ડૉ. એ.પી.જે. અબ્દુલ કલામના પ્રસિદ્ધ વિચાર ‘એક ઉત્તમ પુસ્તક સો સારા મિત્રો બરાબર છે’થી પ્રેરણા લઈને આ સમગ્ર પરિકલ્પના સાકાર કરવામાં આવી છે.
આ અનન્ય કલાકૃતિ પાછળનો મુખ્ય આધાર તેમનો ૧૦ વર્ષનો પુત્ર વ્યોમ જોષી બન્યો છે, જેણે પોતાના જીવનમાં મોબાઇલ અને ટીવીથી સંપૂર્ણ દૂર રહીને અત્યાર સુધીમાં ૮,૦૦૦થી વધુ પુસ્તકોનું વાંચન કર્યું છે. પુત્રની આ વાંચન પ્રત્યેની નિષ્ઠાને રેફરન્સ તરીકે લઈને રિદ્ધિબેને ચિરોડી રંગોની મદદથી આખી કલાકૃતિ તૈયાર કરી છે, જેને પૂર્ણ કરવામાં તેમને ૧૨ થી ૧૫ દિવસનો સમય લાગ્યો હતો. આજની યુવા પેઢી અને બાળકો ડિજિટલ સ્ક્રીનના માયાજાળમાં ફસાઈને વાસ્તવિક દુનિયાથી દૂર થઈ રહ્યા છે, ત્યારે આ રંગોળી તેમને પુસ્તકોની સાચી મિત્રતા અને તેનાથી મળતા માનસિક વિકાસ તરફ પાછા ફરવાની પ્રેરણા પૂરી પાડે છે.
આ રંગોળીનું સૌથી આકર્ષક પાસું તેમાં ટેકનોલોજીનો સકારાત્મક ઉપયોગ છે, જેમાં ચિરોડી રંગોથી જ એક કાર્યરત QR કોડ બનાવવામાં આવ્યો છે. આ ક્યૂઆર કોડને મોબાઈલથી સ્કેન કરવાથી વાંચનપ્રેમીઓ માટે ૧૦ ઉત્તમ પુસ્તકો અને વિશેષરૂપે બાળકો માટેના ૧૦ શ્રેષ્ઠ પુસ્તકોની યાદી ત્વરિત મળી જાય છે, જે આર્ટિસ્ટની આધુનિક અભિગમ દર્શાવે છે. જામનગરની જનતા માટે આ અદ્ભુત રંગોળી ધનતેરસના દિવસથી વાલકેશ્વરી નગરી ખાતે આવેલા શ્રીપતિ એપાર્ટમેન્ટના ચોથા માળે નિહાળવા માટે ખુલ્લી મૂકવામાં આવી છે, જ્યાં મોટી સંખ્યામાં કલા અને પુસ્તક પ્રેમીઓ મુલાકાત લઈ રહ્યા છે.
