ડાયમંડ અને ટેક્સટાઈલ હબ તરીકે જાણીતા સુરત શહેરમાંથી સાયબર ગુનાખોરીની અત્યંત ચોંકાવનારી ઘટના પ્રકાશમાં આવી છે. સાયબર ઠગોએ શહેરના અલગ-અલગ વિસ્તારોમાં રહેતા અગિયાર નિર્દોષ નાગરિકોને પોતાના નિશાના પર લીધા હતા. આ માફિયાઓએ અવનવી અને ભેજાબાજ યુક્તિઓ અપનાવીને એક જ દિવસમાં ૨૪ લાખ રૂપિયાથી વધુની માતબર રકમ પડાવી લીધી છે. એકસાથે આટલા બધા લોકો સાથે છેતરપિંડી થવાની આ ઘટનાથી સમગ્ર શહેરમાં ભય અને ચિંતાનું મોજું ફરી વળ્યું છે.
નાગરિકોને ફસાવવા માટે સાયબર ઠગોએ ટેકનોલોજીનો દુરુપયોગ કરીને અતિ આધુનિક કીમિયા અપનાવ્યા હતા. આરોપીઓએ મોબાઈલ ફોન અપડેટ કરવાના બહાને અથવા પ્લે સ્ટોર પરથી શંકાસ્પદ નકલી એપ્સ ડાઉનલોડ કરાવીને ભોગ બનનારના ફોનનો એક્સેસ મેળવી લીધો હતો. આ ઉપરાંત, ક્રેડિટ કાર્ડના રિવાર્ડ પોઈન્ટ્સ રીડીમ કરવા, ઓનલાઈન રોકાણમાં ઊંચા વળતરની લાલચ તેમજ સોશિયલ મીડિયા પર ટેલિગ્રામ દ્વારા ઘર બેઠા ટાસ્ક પૂર્ણ કરી રૂપિયા કમાવવાની લાલચ આપીને નાગરિકોને આર્થિક રીતે પાયમાલ કરવામાં આવ્યા છે.
એ જ દિવસમાં એકસાથે અગિયાર નાગરિકો સાથે લાખો રૂપિયાની છેતરપિંડી થતાં સુરત પોલીસ બેડામાં પણ દોડધામ મચી ગઈ છે. તમામ ભોગ બનનાર નાગરિકો દ્વારા તાત્કાલિક સુરત સાયબર ક્રાઈમ પોલીસ સ્ટેશનમાં સત્તાવાર ફરિયાદો નોંધાવવામાં આવી છે. પોલીસે તમામ શંકાસ્પદ બેંક ખાતાઓ, યુપીઆઈ ટ્રાન્ઝેક્શન અને મોબાઈલ નંબરોના ટેકનિકલ ડેટાના આધારે સાયબર માફિયાઓને ઝડપી પાડવા સઘન તપાસના ચક્રો ગતિમાન કર્યા છે અને નાગરિકોને સાયબર ફ્રોડ પ્રત્યે સતર્ક રહેવા વિશેષ અપીલ કરી છે.
