બનાસકાંઠા જિલ્લામાં ખેડૂતોના વિવિધ પડતર પ્રશ્નોના કાયમી નિરાકરણની માંગ સાથે ભારતીય કિસાન સંઘના નેજા હેઠળ વિશાળ 'ખેડૂત અધિકાર મહારેલી' યોજાઈ હતી. પાલનપુર તાલુકાના જોડનાપુરા પાટિયા નજીક વહેલી સવારથી જ ઉત્તર ગુજરાતભરમાંથી હજારોની સંખ્યામાં ધરતીપુત્રો અને ખેડૂત આગેવાનો એકઠા થયા હતા. જમીન રિસરવેની ક્ષતિઓ સુધારવા, ટ્રેક્ટર-ટ્રોલી પાર્કિંગના નિયમો હળવા કરવા, બટાકા પકવતા ખેડૂતોને યોગ્ય સબસિડી આપવા તેમજ બનાસ નદીને નર્મદાની મુખ્ય કેનાલ સાથે જોડી સિંચાઈનું પાણી આપવા જેવી અગત્યની માંગણીઓ સાથે ખેડૂતોએ મોરચો માંડ્યો હતો. આ ઉપરાંત ખેડૂતોના કૃષિ વાહનોને ટોલ ટેક્સમાંથી સંપૂર્ણ મુક્તિ આપવાની માંગ પણ આ આંદોલનનું મુખ્ય કેન્દ્રબિંદુ રહી હતી.
જોડનાપુરા ખાતે યોજાયેલી વિરાટ મહાસભા બાદ ખેડૂતોએ સંગઠિત થઈને જિલ્લા કલેક્ટર કચેરી તરફ વિરોધ કૂચ શરૂ કરી હતી. ખેડૂત અગ્રણીઓના જણાવ્યા મુજબ, તેઓએ આવેદનપત્ર આપવા અંગે તંત્રને અગાઉથી લેખિત જાણ કરી હોવા છતાં કલેક્ટર કચેરીએ પહોંચ્યા બાદ તેમને લાંબો સમય પ્રતીક્ષા કરવાની ફરજ પાડવામાં આવી હતી. તંત્રના આ ઉદાસીન વલણ સામે ખેડૂતોનો રોષ ભભૂકી ઉઠ્યો હતો અને તેઓએ પાલનપુરના કોઝી વિસ્તાર નજીક જાહેર માર્ગ પર બેસીને ચક્કાજામ કરી દીધો હતો. મુખ્ય માર્ગો બ્લોક થઈ જવાના કારણે વાહનોની લાંબી કતારો લાગી ગઈ હતી અને ભારે ટ્રાફિકજામ સર્જાતા સામાન્ય વાહનચાલકો ભારે મુશ્કેલીમાં મુકાયા હતા.
સ્થિતિ વધુ તણાવપૂર્ણ બનતી જોઈને જિલ્લા પોલીસ અધિક્ષક તાત્કાલિક ઘટનાસ્થળે દોડી આવ્યા હતા. તેમણે ઉગ્ર બનેલા ખેડૂત આગેવાનો સાથે સીધી વાતચીત હાથ ધરી શાંતિ જાળવવા સમજાવટ કરી હતી. પોલીસ વડાની સફળ મધ્યસ્થી બાદ મામલો થાળે પડ્યો હતો. આખરે બનાસકાંઠા જિલ્લા કલેક્ટર મિહિર પટેલ પોતે કચેરીમાંથી બહાર આવીને આંદોલનકારી ખેડૂતો સમક્ષ પહોંચ્યા હતા. તેમણે ખેડૂત પ્રતિનિધિઓ પાસેથી આવેદનપત્ર સ્વીકારી તેમની તમામ વ્યાજબી માંગણીઓ ઉચ્ચ સ્તરે સરકાર સુધી પહોંચાડવાની ખાતરી આપી હતી, જેના પગલે કલાકો સુધી ચાલેલો ચક્કાજામ પૂર્ણ થયો હતો.
