દિવાળી અને નૂતન વર્ષના પવિત્ર પર્વ નિમિત્તે ઘરોમાં મહેમાનોના સ્વાગત માટે પરંપરાગત રીતે મીઠાઈની સાથે મુખવાસનું પણ વિશેષ મહત્ત્વ રહેલું છે. સામાન્ય રીતે બજારમાં ગણતરીના ૮ થી ૧૦ પ્રકારના મુખવાસ જોવા મળતા હોય છે, પરંતુ જામનગરના વ્યાપારીઓ દ્વારા તૈયાર થતી ૧૫૦થી વધુ પ્રકારની વૈવિધ્યસભર વેરાયટીઓ આ વર્ષે ગ્રાહકોનું મુખ્ય આકર્ષણ બની છે. અલગ-અલગ રંગ, અદભુત સ્વાદ અને મનમોહક સુગંધ ધરાવતા આ મુખવાસે તહેવારોની મોસમને વધુ રંગીન બનાવી દીધી છે, જેના કારણે સ્થાનિક બજારોમાં ગ્રાહકોની ભારે ભીડ જોવા મળી રહી છે.
જામનગરના આ પરંપરાગત મુખવાસની લોકપ્રિયતા હવે સીમાઓ ઓળંગીને આંતરરાષ્ટ્રીય બજારો સુધી પહોંચી ચૂકી છે. બજારમાં ઉપલબ્ધ કલકત્તી મુખવાસ, મસાલા આદુ, સ્વીટ આમળા, કેરી ગોટલીનો મુખવાસ અને ડ્રાયફ્રૂટયુક્ત રોયલ મુખવાસ જેવી અવનવી વેરાયટીઓ ભારે માંગમાં છે. માત્ર દેશના અન્ય રાજ્યો જ નહીં, પરંતુ અમેરિકા, યુકે અને ગલ્ફ દેશોમાં સ્થાયી થયેલા પ્રોવાસી ગુજરાતીઓ પણ આ ખાસ મુખવાસના સ્વાદના દીવાના બન્યા છે. વિદેશોમાં વસતા લોકો ત્યાં બેઠા-બેઠા જામનગરના અસલી સ્વાદનો આનંદ માણી શકે તે માટે ખાસ ઓર્ડર આપી રહ્યા છે, જે વેપારીઓ માટે ભારે ઉત્સાહનો વિષય બન્યો છે.
નવા વર્ષની શરૂઆત હંમેશાં કંઈક મીઠી અને તાજગીસભર યાદો સાથે કરવાની ગુજરાતીઓની પરંપરા રહી છે, અને તેમાં જામનગરી મુખવાસ ઉત્તમ વિકલ્પ સાબિત થાય છે. આ વિવિધ પ્રકારના ગુણવત્તાસભર મુખવાસ બજારમાં માત્ર રૂ. ૨૦૦ થી ૬૦૦ પ્રતિ કિલોના વ્યાજબી ભાવે ઉપલબ્ધ કરાવવામાં આવી રહ્યા છે, જેથી મધ્યમ વર્ગથી લઈને દરેક પરિવાર તેનો આનંદ માણી શકે છે. તહેવારોની આ સિઝનમાં મુખવાસના વેપારમાં આવેલા આ અણધાર્યા ઉછાળાથી જામનગરના સ્થાનિક વેપારીઓમાં ખુશીની લહેર છવાઈ ગઈ છે અને બજારમાં ભારે આર્થિક રોનક જોવા મળી રહી છે.
