ઇજિપ્તના સત્તાવાર સૂત્રો દ્વારા આપવામાં આવેલી માહિતી અનુસાર, ગીઝાથી ફયુમ તરફ જઈ રહેલી એક પેસેન્જર ટ્રેન કૈરોથી આસવાન તરફ જઈ રહેલી અન્ય એક ટ્રેનની પાછળધડકી હતી. આ ભયાનક અકસ્માત કૈરોની નજીક આવેલા ગીઝા પ્રાંતના અલ-અય્યાત જિલ્લામાં સર્જાયો હતો. ટક્કર એટલી જોરદાર હતી કે તેના કારણે ટ્રેનના ડબ્બા પાટા પરથી નીચે ઉતરી ગયા હતા, જેનાથી મુસાફરોમાં ભારે નાસભાગ અને ફફડાટ ફેલાઈ ગયો હતો.
ઘટનાની જાણ થતાં જ ઇજિપ્તના આરોગ્ય મંત્રાલય અને રેલવે સત્તાવાળાઓ દ્વારા તાત્કાલિક ધોરણે કટોકટીની ટીમો અને ક્રેનને ઘટનાસ્થળે રવાના કરવામાં આવી હતી. ઇજાગ્રસ્ત થયેલા તમામ ૬૪ જેટલા મુસાફરોને તાત્કાલિક નજીકની હોસ્પિટલોમાં ખસેડવામાં આવ્યા છે, જ્યાં તેમને યોગ્ય તબીબી સારવાર આપવામાં આવી રહી છે. સદનસીબે હજુ સુધી આ દુર્ઘટનામાં કોઈ જાનહાનિ થયાના અહેવાલ નથી, પરંતુ ઇજાગ્રસ્તોમાંથી કેટલાકની સ્થિતિ ગંભીર હોવાની આશંકા વ્યક્ત કરવામાં આવી રહી છે.
રેલવે ઓથોરિટી દ્વારા હાલમાં ક્ષતિગ્રસ્ત ટ્રેનો અને કાટમાળને હટાવવાનું યુદ્ધના ધોરણે કામ ચાલી રહ્યું છે જેથી રેલવે વ્યવહારને વહેલી તકે પૂર્વવત કરી શકાય. ઉલ્લેખનીય છે કે ગીઝા પ્રાંતના આ જ વિસ્તારમાં ગત સપ્ટેમ્બરે પણ બે નૌકા કે માલગાડીઓ વચ્ચે અકસ્માત સર્જાયો હતો, જેણે રેલવે સુરક્ષા સામે ફરી એકવાર ગંભીર સવાલો ખડા કર્યા છે. પ્રશાસન દ્વારા આ સમગ્ર દુર્ઘટના પાછળના ચોક્કસ કારણો જાણવા માટે તપાસના આદેશ આપવામાં આવ્યા છે.
