અમદાવાદના નરોડા વિસ્તારમાં બનેલી આ હૃદયદ્રાવક ઘટનાએ સમગ્ર વિસ્તારમાં ચકચાર મચાવી દીધી છે. ડભોડા ખાતે આવેલી સાડા ચાર વીઘા જમીનના વેચાણ અને વાંધા અરજીને લઈને લાંબા સમયથી વિવાદ ચાલી રહ્યો હતો. આ જમીન બાબતે અગાઉના બે ભાગિયાઓ અને જમીનના મૂળ માલિકના છ વારસદારો દ્વારા મૃતકને સતત માનસિક ત્રાસ આપવામાં આવતો હતો અને જાનથી મારી નાખવાની ધમકીઓ પણ આપવામાં આવતી હતી. આ અસહ્ય ત્રાસ અને ભયના વાતાવરણથી કંટાળીને આખરે ગત 4 નવેમ્બરના રોજ તેમણે નર્મદા કેનાલમાં કૂદીને પોતાની જીવનલીલા સંકેલી લીધી હતી, જેનો મૃતદેહ 6 નવેમ્બરના રોજ મળી આવ્યો હતો.
આ સમગ્ર પ્રકરણની વિગતો મુજબ, ડભોડાની આ જમીન અગાઉ વાવવા માટે બે ભાગિયાઓને આપવામાં આવી હતી, પરંતુ તેમનું કામ યોગ્ય ન જણાતા તેમને છૂટા કરવામાં આવ્યા હતા. ત્યારબાદ તેમાંથી અમુક જમીન અન્યને વેચી દેવામાં આવી હતી અને બાકી રહેલી જમીનમાંથી એક ભાગિયાની પત્નીને પણ જમીન વેચાણથી આપવામાં આવી હતી. આ વેચાણ સામે જમીનના મૂળ માલિકના છ વારસદારોએ વાંધા અરજી દાખલ કરી હતી, જેના કારણે જમીનની એન્ટ્રી સર્ટીફાઈડ થવામાં અડચણો ઊભી થઈ હતી. વર્ષ 2021થી ચાલી રહેલા આ કાનૂની અને પારિવારિક વિવાદને કેન્દ્રમાં રાખીને આ તમામ આઠ શખ્સો દ્વારા આધેડને સતત હેરાન કરવાનું શરૂ કરવામાં આવ્યું હતું, જેના કારણે તેઓ ગંભીર માનસિક તણાવમાં સરી પડ્યા હતા.
આત્મહત્યા કરતા પહેલા આધેડે પોતાના ભત્રીજાને વોટ્સએપ પર મેસેજ અને ફોટા મોકલીને આ પગલું ભર્યું હોવાનું સામે આવ્યું છે. એટલું જ નહીં, ઘટના બાદ મૃતકના ઘરેથી મળી આવેલી સુસાઈડ નોટમાં પણ આ તમામ આઠેય આરોપીઓ દ્વારા અપાતી ધમકીઓ અને ત્રાસનો સ્પષ્ટ ઉલ્લેખ જોવા મળ્યો છે. મૃતકના પુત્ર દ્વારા નરોડા પોલીસ સ્ટેશનમાં આપવામાં આવેલી સચોટ ફરિયાદ અને પુરાવાઓના આધારે પોલીસે તમામ આઠ આરોપીઓ સામે દુષ્પ્રેરણ અને ગુનાહિત ધમકીનો ગુનો નોંધીને આગળની સઘન તપાસ શરૂ કરી છે. આ ઘટનાએ જમીન વિવાદોમાં વધતી જતી હિંસા અને માનસિક શોષણ સામે ગંભીર સવાલો ખડા કર્યા છે.
