મૂળ રાજસ્થાનના કોટપૂતલી-બેહરોડ વિસ્તારનો વતની અને હરિચંદ જાટ ઉર્ફે હરી બોક્સર જયપુરમાં બોક્સિંગ શીખ્યા બાદ ગુનાખોરીની દુનિયામાં પ્રવેશ્યો હતો. તે વિદેશમાં બેસીને કુખ્યાત ગેંગસ્ટર લોરેન્સ બિશ્નોઈ અને રણદીપ મલિકની ગેંગ વતી દેશના મોટા વેપારીઓ અને સેલિબ્રિટીઓ પાસેથી કરોડો રૂપિયાની ખંડણી વસૂલવાનું મોટું નેટવર્ક ચલાવતો હતો. દિલ્હી, રાજસ્થાન, પંજાબ અને હરિયાણા જેવા રાજ્યોમાં તેના વિરુદ્ધ હત્યા, હત્યાના પ્રયાસ, ફાયરિંગ અને જાનથી મારી નાખવાની ધમકીઓના અનેક ગંભીર ગુનાઓ નોંધાયેલા છે. ભારતીય સુરક્ષા એજન્સીઓની લાંબા સમયથી તેની ઉપર બાજ નજર હતી અને આંતરરાષ્ટ્રીય સ્તરે તેના લોકેશનની માહિતી મળ્યા બાદ કેલિફોર્નિયામાં મોટી કાર્યવાહી કરવામાં આવી છે.
આ કુખ્યાત ગેંગસ્ટરનું નામ માત્ર ખંડણી કે ગેંગ વોર પૂરતું મર્યાદિત નહોતું, પરંતુ તે બોલિવૂડની દિગ્ગજ હસ્તીઓ અને મનોરંજન જગતને ધમકાવવામાં પણ મુખ્ય સૂત્રધાર હતો. કેનેડામાં જાણીતા કોમેડિયન કપિલ શર્માના કાફે પર થયેલા ફાયરિંગ પ્રકરણમાં પણ તેનું નામ સામે આવ્યું હતું. આ ઉપરાંત, ફિલ્મમેકર રોહિત શેટ્ટીના ઘર બહાર થયેલા ગોળીબારની જવાબદારી પણ તેણે જ સ્વીકારી હતી અને સોશિયલ મીડિયા દ્વારા બોલિવૂડ સ્ટાર્સ રોહિત શેટ્ટી, રણવીર સિંહ તથા તુષાર કપૂરને જીવથી મારી નાખવાની ધમકીઓ આપી હતી. તેના દ્વારા મોકલવામાં આવેલા ધમકીભર્યા ઓડિયો મેસેજ અને આંતરરાષ્ટ્રીય કોલ્સને પગલે મુંબઈ ક્રાઈમ બ્રાન્ચે અગાઉ તેના વિરુદ્ધ લુક આઉટ સર્ક્યુલર (LOC) પણ જારી કર્યો હતો.
હરી બોક્સરની અમેરિકામાં અટકાયત બાદ હવે ભારતીય તપાસ એજન્સીઓ દ્વારા તેને દેશમાં પરત લાવવાની ઔપચારિક પ્રક્રિયા ઝડપથી શરૂ કરવામાં આવશે. આ સમગ્ર પ્રક્રિયા સેન્ટ્રલ બ્યુરો ઓફ ઇન્વેસ્ટિગેશન (CBI) ના માધ્યમથી સંકલિત કરવામાં આવશે, જે ભારતની નોડલ એજન્સી તરીકે કામ કરે છે. અગાઉ દિલ્હી પોલીસ અને એસટીએફની સંયુક્ત તપાસમાં ખુલાસો થયો હતો કે હરી બોક્સર એન્ક્રિપ્ટેડ સોશિયલ મીડિયા ચેનલો દ્વારા ભારતમાં સક્રિય પોતાના સાથીદારોને હથિયારો પૂરા પાડવા અને ફાયરિંગ કરવા માટેના નિર્દેશો આપતો હતો. આ કુખ્યાત ગેંગસ્ટરના ઝડપાઈ જવાથી અંડરવર્લ્ડ અને વિદેશી ધરતીથી ચાલતી ગુનાહિત પ્રવૃત્તિઓ પર મોટો ફટકો પડ્યો છે.
