રાજકોટના ઐતિહાસિક રેસકોર્સ ક્રિકેટ સ્ટેડિયમ ખાતે ગઇકાલે ધનતેરસના પાવન અવસરે યોજાયેલી પરંપરાગત આતશબાજી નિહાળવા માટે અંદાજે વીસ હજાર જેટલા ઉત્સાહી નાગરિકો ઉમટી પડ્યા હતા. આ ભવ્ય આકાશી રંગોળીનો આનંદ માત્ર સ્ટેડિયમની અંદર જ નહીં, પરંતુ રેસકોર્સ સંકુલ અને આસપાસના રીંગ રોડ પર બેસીને પણ હજારો લોકોએ માણ્યો હતો. સ્ટેડિયમ અને તેની આસપાસ જામેલી માનવમેદનીથી આખો વિસ્તાર છલકાઈ ગયો હતો. જો કે, આ ભવ્યતાની સાથે જ ટ્રાફિક જામ, વાહનોના અનિયંત્રિત ખડકલા અને ભીડના કારણે સર્જાતી અફરાતફરીએ તંત્ર અને નાગરિકો બંનેને ગંભીર ચિંતામાં મૂકી દીધા છે. છેલ્લા ત્રણ મહિનામાં આ બીજી વખત એવી સ્થિતિ સર્જાઈ છે જ્યાં લોકો અને ખુદ પદાધિકારીઓને પણ આ પ્રકારના લોકપ્રિય કાર્યક્રમો હવે સ્માર્ટ સિટી જેવા વિકસિત અને વિશાળ એરિયામાં શિફ્ટ કરવાની જરૂરિયાત અનુભવાઈ રહી છે.
વર્ષોથી શ્રાવણ માસ દરમિયાન યોજાતો રાજકોટનો લોકમેળો હોય કે પછી દિવાળીની આતશબાજી, આ તમામ આયોજનો વખતે રેસકોર્સ અને તેની આસપાસના રહેણાંક વિસ્તારોના રહીશો ટ્રાફિક અને ઘોંઘાટથી ત્રાહિમામ પોકારી જાય છે. મેળા અને આવા મોટા ઉત્સવો વખતે અડધો રીંગ રોડ બંધ કરી દેવાની ફરજ પડે છે, જેના કારણે સ્થાનિક રહેવાસીઓને ભારે મુશ્કેલીઓનો સામનો કરવો પડે છે. ધારાસભ્ય ડૉ. દર્શિતા શાહ દ્વારા પણ જન્માષ્ટમીનો મેળો શહેર બહાર લઇ જવા માટે અગાઉ અનેક વખત રજૂઆતો કરવામાં આવી છે, પરંતુ માત્ર ગ્રાન્ટ અને ખર્ચના બહાના હેઠળ આ મહત્વના મુદ્દાને દર વર્ષે ટાળી દેવામાં આવે છે. પરિણામે, દર વર્ષે એ જ પુનરાવર્તન થાય છે કે તંત્ર દરવાજા બંધ કરવાની કે બહાર વાહનો પાર્ક કરવાની મજબૂરી સાથે કામ ચલાવે છે અને કાર્યક્રમ પૂરો થતાં જ પોલીસ તથા વહીવટી તંત્ર રાહતનો શ્વાસ લે છે.
આ ગંભીર પરિસ્થિતિને જોતા હવે સમય આવી ગયો છે કે કલેકટર, મેયર અને મ્યુનિસિપલ કમિશનર સહિતના શીર્ષ અધિકારીઓ કોઈ નક્કર અને દુરદર્શી આયોજન કરે. આગામી જન્માષ્ટમીના મેળાને હજુ નવ મહિનાની અને દિવાળીની આતશબાજીને એક વર્ષની વાર છે, ત્યારે સરકાર અને તંત્ર પાસે આયોજન બદલવા માટે પૂરતો સમય ઉપલબ્ધ છે. જો નાગરિકો કોઈપણ જાતની હાલાકી વિના સલામત રીતે તહેવારોનો આનંદ માણી શકે તેવી વ્યવસ્થા કરવી હોય, તો રેસકોર્સના ખીચોખીચ મેદાનને બદલે આવા ભવ્ય મહોત્સવોને શહેરની ભાગોળે આવેલા સ્માર્ટ સિટી વિસ્તારમાં લઇ જવાની દિશામાં ગંભીરતાથી વિચારવું જ પડશે.
