ઉત્તર પ્રદેશના બુલંદશહર જિલ્લાના ઓરંગાબાદ સાથે મૂળ ધરાવતા અને ગાઝિયાબાદમાં ઉછરેલા સબા હૈદરે તાજેતરમાં ઇલિનોઇસના ૮૪મા હાઉસ ડિસ્ટ્રિક્ટમાંથી ચૂંટણી જીતીને ઇતિહાસ રચ્યો છે. તેમણે રિપબ્લિકન ઉમેદવાર બ્રાયન સ્કોપા સામે ૭૦.૯ ટકા એટલે કે ૨૦,૭૫૬ મતો મેળવીને શાનદાર વિજય હાંસલ કર્યો છે અને તેઓ ઇલિનોઇસ જનરલ એસેમ્બલીમાં ચૂંટાયેલા પ્રથમ દક્ષિણ એશિયન મહિલા બન્યા છે. આ મોટી સફળતા બાદ તેમણે પોતાના બાળપણના દિવસોને યાદ કરતા જણાવ્યું હતું કે તેમના પિતા સરકારી ઇજનેર હતા જેઓ રોજ નોકરી માટે મુસાફરી કરતા, જ્યારે માતા ઘર સંભાળતા હતા. તેમના ઉચ્ચ મધ્યમવર્ગીય પરિવારમાં ક્યારેય કોઈની જાતિ કે ઓળખ પૂછવામાં નહોતી આવતી, પરંતુ હંમેશાં જરૂરિયાતમંદોને મદદ કરવાનો જ નિયમ રહ્યો હતો.
સબા હૈદરે પોતાના બાળપણના સંસ્કારો વિશે વાત કરતા કહ્યું કે તેમણે નાનપણથી જ તેમના માતા-પિતાને પડોશીઓની હોસ્પિટલની મુલાકાતોમાં મદદ કરતા, બાળકોને પુસ્તકો પૂરા પાડતા અને વરિષ્ઠ નાગરિકોની સંભાળ રાખતા જોયા છે. તેમના પિતા હંમેશાં એવું શીખવતા કે વિશેષ અધિકાર કે સુખ-સગવડ એ માત્ર આરામ માટે નથી, પરંતુ તે જનસેવા માટે છે. પિતા આખો દિવસ ઈમાનદારીથી સાર્વજનિક ઇન્ફ્રાસ્ટ્રક્ચરનું નિર્માણ કરતા અને ઘેર આવ્યા પછી પોતાના પડોશની સેવા કરતા. આ જ પરિવારે આપેલા મૂલ્યોને કારણે સબાએ કિશોરાવસ્થાથી જ પડોશના બાળકોને મફતમાં ટ્યુશન આપવું અને વરિષ્ઠ નાગરિકોની સંભાળ રાખવા જેવા સામાજિક કાર્યોમાં સક્રિય યોગદાન આપવાનું શરૂ કરી દીધું હતું.
અમેરિકાની ચૂંટણીમાં આ જ લોકસેવાના મંત્રને આગળ વધારતા સબા હૈદરે પોતાના ચૂંટણી પ્રચારમાં જીવનનિર્વાહના વધતા ખર્ચ, શિક્ષણને પરવડે તેવું બનાવવા અને બાળકો માટે સુરક્ષિત સમુદાયોનું નિર્માણ જેવા મુદ્દાઓને પ્રાથમિકતા આપી હતી. ગાઝિયાબાદથી લઈને ઇલિનોઇસ સુધી તેમની આ સફર માત્ર એક રાજકીય વિજય નથી, પરંતુ તે બાળપણમાં શીખેલા નિઃસ્વાર્થ સેવાના પાઠોનું પરિણામ છે. તેમણે સ્પષ્ટપણે જણાવ્યું હતું કે તેમના પરિવાર માટે કોઈ જરૂરિયાતમંદને મદદ કરવી એ ક્યારેય રાજકારણ નહોતું, પરંતુ તે તેમની જીવનશૈલીનો એક અભિન્ન ભાગ હતો. આજે આ દ્રઢ વિચારોના કારણે જ તેમણે અમેરિકી રાજકારણમાં એક નવો કીર્તિમાન સ્થાપિત કર્યો છે.
